O le tuputupu a‘e o Baby James, ua lua tausaga ma masina nei lona matua, ma o se alo e faasino i ni matua i Samoa ae o lona tuputupu a‘e e lē o sagatonu e tusa ma le ola lelei ma le ola fiafia o soo se tamaititi.
E pei ona silasila i le ata, o se solouli i le itu taumatau o foliga o le alii o James ua mafiafia ai ma le ola o ni fulufulu ma e ta‘ua lea i le gagana faafomai i le faaperetania, o le giant hairy congenital naevus.
O loo lotolotoi le alii o James i le aoga mo fanau ua lē gafatia e o latou mātua ona totogi pili aoga, o loo faafoeina e le Faalapotopotoga o le Toomaga mo Tagata Puapuagatia, le Samoa Victim Support Group.
O le faalapotopotoga foi lea o loo latou faia ni sailiga e maua ai se fesoasoani e togafiti ai e fomai i fafo le faaletonu o foliga o James. Faaalia e le Peresitene o le faalapotopotoga le faletua o Lina Chang, o se mafatiaga tele lea i le vaavaai i le alii o James ona o se tamaitiiti ola fiafia, se‘i vaganā le faaletonu o loo fia maua ai se fesoasoani.
O le lala foi o le Toomaga i Niu Sila o loo galulue mo le sailia o se fesoasoani.
E lē o faailoaina mai e le peresitene pe o saili e le faalapotopotoga ni fesoasoani tau tupe poo ni fomai, poo ni faalapotopotoga foi i fafo e mafai ona latou saili ni seleni e faatupu ai se togafitiga mo Baby James.
O polokalame faagasolo a le faalapotopotoga i Samoa o loo afea ai pea i le agalelei o nisi o faalapotopotoga ma tagata taitoatasi.
E $700 tala se foai tupe a le Ao Pupula Ministry mai Massey i Aukilani i Niu Sila, ma ua momoli ai le faafetai tele a le peresitene i le faletua o Tina Mulburn ma lea faalapotopotoga i le agalelei.
O lea tamaitai sa malaga mai i Samoa i nai vaiaso e lei mamao atu, lea sa ia molimauina ai galuega o feagai ma le Toomaga mo Tagata Puapuagatia ma oso ai lona fia fesoasoani e pei ona lafo mai le foai tupe.
O lea seleni na faaalia e le peresitene o le a fesoasoani i le tausia o alo ma fanau sauāina o loo i lalo o le vaaiga a le faalapotopotoga.
O le taimi nei o loo vaaia e le Toomaga le fanau e toavalu a le ulugalii o Faafetai ma Faasalafa Sione o loo soloatoa i le falepuipui.
O le vaiaso ua mavae na feiloai ai le Toomaga ma mātua o tamaiti e pei ona faaalia e le peresitene i le fia sailia lea o so la finagalo poo ai e tatau ona tausia le la fanau.
Fai mai Lina le peresitene o le Toomaga, o loo mananao le ulugalii e vaai pea e le faalapotopotoga le la fanau ae lē o nisi o o la aiga. Peitai o le a toe faia se feiloaiga a mātua ma tamaiti e toavalu i le vaiaso fou e toe saga faamautu ai lenei tulaga.
O tamaiti uma ua faapea ona aooga ma faatupe e le Toomaga o latou pili faapea lavalava aoga ma meaai o loo tausia ai.
