E tasi le vaiaso le mafutaga lenei a sui o le Vaega Faaupufai e Puipuia Aiā Tatau a Tagata le HRPP – Na faalauiloa lava e lo latou taitai Tuilaepa Lupesoliai Sailele Malielegaoi i le vaiaso ua tuanai lea faamoemoe.
O lana faamatalaga i tusitala, ua moomia se taimi e agai uma mai ai sui fou o le Vaega Faaupufai ma se‘i talanoaina le galuega faafaipule aemaise o le vaavaai i auala e faaleleia ai le auaunaga.
E ui i felafoaiga a o loma ai le faiga filifiliga a le atunuu, na lagā lava e le Taitai o le HRPP le malosi o le finauga ua faapea ona faataoto atu e le Tautua Samoa, ma o le tulaga lea ua tatau ai ona toe iloilo le faatinoga o galuega a le Vaega Faaupufai.
Ta‘ua e Tuilaepa Lupesoliai Sailele, o soo se faalapotopotoga lava e iai taimi e tatau ona toe iloilo ai poo fea tonu o agai i ai le faatinoga o galuega.
E iai foi taimi ua lē atoatoa ai le faatinoga o galuega auā le atina‘e o le atunuu, ae o le tāua lea o nei ituaiga mafutaga ina ia mafai ona lagā mataupu ua faapea ona lagalagā mai e le isi itu ua tulai mai nei o le Vaega Faaupufai e agaia le Malo.
E pei ona fofogaina ai le atunuu, o le faaiuga o le Palota i lona uluai faitauga o lea e 36 faipule a le HRPP ma le to‘a 13 o le a fai nei ma sui o le Tautua Samoa i totonu o le Palemene.
A faamaonia le faitauga muamua lea ua iai o le Palota a le Atunuu o lona uiga e oo atu i le to‘a 25 faipule fou o le Palemene ma o le toatele lava o sui o le HRPP.
O i latou la ia na ta‘ua e Tuilaepa Lupesoliai, o le a agai i ai le tele o le taimi i le mafutaga lenei. Faaalia e le Taitai o le HRPP e tāua tele le unai o mataupu e tatau ai ona faamalamalama tiute ma matafaioi.
O sui o le HRPP ia sa faipule ua malolo ma ua lē tulai mai ua aofia ai le Minista o Faamatalaga ma Fesootaiga Televavave, le Afioga Safuneituuga Paaga Neri ae ua sui mai e le isi foi HRPP. Ua pa‘ū le Afioga Unasa Mesi lea sa Minisita o Faamasinoga.
Ua pa‘ū Toomata Alapati Paese II – lea sa Minisita o Aoga. O le toatolu lena o sui o le Kapeneta ua mae‘a atu ua lē o toe foi mai i le Palemene.
O loo tulai uma mai isi sui o le Kapeneta sa iai. Ese mai i lē sa Sui Palemia lea ua lē o toe iai i le Palemene, le Afioga Misa Telefoni.
E iai uso ua tulai mai o Maualaivao Pat Ah Him o le palota taitoatasi lea ua tulai faatasi mai i le HRPP ma lona uso, Muagututagata Peter Ah Him o Sagaga Le Usoga.
O loo tumau mai Papaliitele Niko Lee-Hang i le isi nofoa o le Palota taitoatasi, i lalo o le fu‘a a le HRPP.
E toatele sui fou ua agai mai ma o Salega lea e lua ona nofoa, ua tulai uma mai ai sui o le Tautua.
O le Vaimauga i Sisifo lea ua sui uma ona nofoa e lua ua tulai mai ai Lefau Harry Schuster lea sa Faamasino o se sui o le Tautua Samoa, ma Lenata‘i Victor lea o loo tulai mai i le HRPP ae ua malolo ai le Afioga Anauli Pofitu Fesili lea sa tulai mai i le HRPP faapea ai Patu Ativalu Togi II – lea na tulai mai foi o le sui o le HRPP.
