Ua tapena foi Ueligitone e talimalo i le taamilosaga masani ai i tausaga taitasi a le IRB Sevens, o le Vae lona 4 lea ua agai mai nei i ai le Sevens lenei i Ueligitone.
O taaloga mulimuli i le vae lona tolu sa faia lea i Aferika i Saute a o lei faia le Kerisimasi i le tausaga talu ai.
E tusa ai ma faamatalaga faamaumauina o lenei taamilosaga, o lea ua 15 tausaga talu ona talimalo Ueligitone i lenei faamoemoe, ma e mai i lena 15 tausaga talu ona talimalo Niu Sila i lenei tauvaga ma taaloga o le Sevens, e na o le faatolu ona lē manuia Niu Sila i ana taligamalo i lenei Sevens.
O loo faamauina i talafaasolopito o nei taaloga, o Tausaga nei na lē maua ai e Niu Sila le vae o le Sevens lenei i ona eleele
2005-2006 Fiji
2008-2009 South Africa
2009-2010 Samoa
Na o le pau lea o tausaga na lē ausia ai e Niu Sila le Siamupini i ona lauelele, a o isi uma tausaga o loo matamata tetele ai Niu Sila o le Siamupini o na tausaga.
O loo tau i ai le popolega i le taamilosaga o lenei tausaga, e ono pa‘ū maualalo le fuainumera o tagata latou te maimoaina nei taaloga i le Westpac Stadium i le tausaga nei.
O loo iai le talitonuga ai ona o le tulai mai o le Auckland Nines ua avea ma auala ua vaeluaina ai le tapuaiga sa masani ona tumutumu ai Ueligitone i lea taimi.
Se vaaiga i le Au filifilia a Samoa mo Ueligitone ma Las Vegas
Forwards: Reupena Levasa, Lafaele Va‘a, Sam Franklin, Tain Lam, Greg Foe
Backs: Sani Niue, Lolo Lui, Tulolo Tulolo, Samoa Toloa, Tila Mealoi, Jonathan Malo, Tim Nanai-Williams, Fomai Ah Ki
Head Coach: Fuimaono Titimaea Tafua
Asst Coach: Galumalemana Rudolph Moors
Physio: Dillion Lal
O faaleoleo o loo tapuai mai i fanua i Samoa o loo aofia ai Faalamiga Selesele, Jay Saena, ma Alefosio Tapilo. O Samoa o loo i le Pool D, faatasi ma Argentina, Scotland, Kenya, Samoa.
O le taaloga muamua a Samoa e taaalo ai muamua ma Scotland, sosoo ai lea ma Argentina, ae lona tolu ai Kenya i le aso muamua. Ona faatoa iloa ai lea i le mae‘a ai o taaloga i le aso muamua, ‘au mo le aso lona lua o le taamilosaga.
Tatou tapuaia le alo faiva o nei o le atunuu ina ia siitia le tulaga o Samoa i lenei tausaga i Ueligitone.
