O le tasi lenei o laau na vaaia i taimi o le Esetete Tausi i Samoa nei i le tele o vaega na iai a latou faatoaga.
Na manatu foi le toatele ua mou le kofe ma Samoa, peitai ua lē sa‘o lea lagona ina ua maua se avanoa e feiloai ai ma se tamaalii ua loa tausaga o ia faatinoina lea atinae.
O le tamā ia Amituanai Lazy Amituanai o Aleisa na ia faailoa le tulaga lelei o loo iai lona toga kofe aemaise o le tupe maua.
O le telē o lona fanua e 56 eka, o lea 56 eka pe a ma le 50 ua opo atoa i le kofe.
Na ia faailoa e faapea, o lana kofe e gaosi lava i Samoa nei ma kiliva ai i Upolu faapea foi ma Savaii.
“Ua leva tausaga o matou faia lenei atinae, ma ua matou mautinoa foi le lelei o le tupe o loo maua mai ai.
“A oo ina tau le kofe e iai tagata faigaluega latou te faaaogāina mo le tauina ona e fai si telē tele o le faatoaga .
“O nei tagata e mai le afioaga o Leauvaa ma Tuanai ma e totogi kilo ma e iai isi tagata e uma ane le vaiaso e lata i le $700.00 le tupe maua e fua lava i le tele o ana kilo.”
O le tamā ia Amituanai o loo alala uma ona alo i Niu Sila ma na o ia lava ma le tina o le aiga i Samoa nei.
I le faatalatalanoaga ma Amituanai o lona talitonuga o se alagatupe lelei tele ma e tatau foi ona faia e se tagata e lē fiu gofie.
O le auga o lana faaaliga lea na ia faailoa ai e faapea, soo se atinae e mautinoa le anoanoai o luitau ma faafitauli e mai lea taimi i lea taimi.
O lona talitonuga ona ua fai si leva o ia faia lenei atinae ma ia molimauina ai le anoanoai o faamanuiaga ua ia maua mai ai. O le tamā ia Amituanai ua 71 nei tausaga o lona soifua ma o loo iai pea le naunautaiga e faaauau pea lenei atinae e fesoasoani ai i le tamaoaiga o le atunuu.
