O le a siitia le numera o loli fuimu i le tolusefulu pe a taunuu se foai tupe a le Malo o Iapani ua tauaaoina nei e le pulega o le tineimu ma galuega laveai i taimi o faalavelave faafuasei.
E 77 afe selau fitusefulu tasi tala Amerika le siakitupe o le a faatau mai ai i Iapani ni loli fuimu se fā, sa faaaogā muamua ae o loo lelei atoatoa, mo le tautua a le fuimu i Samoa ma o le a maua ai le aofaiga o loli fuimu mo galuega a le pulega i Samoa i le 30.
O se fesoasoani tāua o le a faapea ona toe faaopoopo atu ai nisi loli fuimu mo ofisa poo lala o lenei tautua o loo i vaega eseese o le atunuu.
O le Pule sili ma le Komesina o le tineimu le susuga Lelevaga Faafouina Mupo na ia taliaina lea foai mai le alii amapasa o Iapani mo Samoa le afioga Tuimaugaoalii Kazumasa Shibuta. O se tasi o foai a lea Malo ua tuuina atu i lenei vaiaso, o se siakitupe e $94,420 tala Amerika mo le fausia o se faleaoga fou e valu potu mo le aoga tulagalua a Vaiee.
O se fesoasoani ua faaauala mai i foai a lea Malo mo taimi o faalavelave faalenatura ona o nisi o faalavelave faalenatura ua mavae ua mafua ai ona faaletonu le saogalemu o le faleaoga tulagalua o lea afioaga.
O le Aso Toonai foi na tea nei le aso mulimuli o Ianuari 2015 na umusa ai se isi fesoasoani a Iapani. O le faleaoga tulagalua o Fasitoo-tai ua toe faafou faapea le fausia o se maota fou poo se hall mo meafai a le aoga. O le tau o lea galuega e silia i le $121,000 tala Samoa.
O se galuega sa faatupe le vaega tele e Iapani ae sa iai foi ma le sao o le nuu, e pei lava foi o isi galuega faapenei ua mae‘a ona umusa ma tatala, auā o le aiaiga lea o le fesoasoani a lea Malo.
Ua tuanai atu lena tausaga sa faapea ona faatino ai foi e Iapani i lalo o ana fesoasoani mo Samoa le fausia o nisi o faleaoga tulagalua i le atunuu, ma ua tele faleaoga ua fausia ai. O le faafetai a le afioga i le Palemia na ia tatala aloaia le galuega i Fasitoo-tai, le agalelei pea o lea Malo ia Samoa ma le atinae o aoaoga ua lelei ai faleaoga ua faaaogā mo le aoaoina o alo ma fanau a le atunuu.
O loo iai foi nisi fesoasoani faapenei ua mae‘a tauaaoina atu siakitupe i sui o komiti a aoga ma o loo faagasolo galuega mo le fausia. O se taimi oi luma o le a tatala ai foi mo le faaaogāina e fanau ma faiaoga.
