E lei leva ona taunuu mai i Niu Sila le atalii o Hollyfield Lafaialii Peseta e 10 tausaga, faapea foi le alii o Venesi Pasolo, peitai sa faamanuiaina lo la taumafai i se tauvaga lauga faa-Samoa sa faataunuuina i le vaiaso atu i ona tua.
O Hollyfield ma Venesi o loo aoaoga uma i le aoga a Sir Edmond Hillary Collegiate Jr i Otara.
O le tauvaga o le tausaga lima, sa manumalo ma suipi ai le alii o Hollyfield Lafaialii, a o le tausaga ono sa mauaina lea e le alii o Venesi Pasolo.
O le polokalame lenei o tauvaga lauga faa-Samoa, e masani ai ona faataunuuina i tausaga taitasi. O le autū lava ma le pogai ina ia tatai pea ma ia aua ne‘i galo i le fanau, le tāua o le gagana Samoa, aemaise ai o tu ma aga masani a le atunuu.
E tāua tele le malamalama ma mautinoa e tamaiti, tusa lava poo fea le atunuu o le lalolagi e aumau ai, ae tāua lava le iloa ma le manatua o le gagana. O le atalii ia Hollyfield sa ia mauaina foi le tulaga muamua i le tauvaga o le tausaga talu ai 1999, peitai ua toe siamupini foi i le 2010, e pei ona faamaonia mai e le tamaitai faiaoga o Samand Elise.
E pei ona faamaonia mai foi e le susuga i le faiaoga, ua lua tausaga sosoo o manumalo pea le alii o Hollyfield, ae faato‘ā lua ai foi lea o tausaga talu ona taunuu mai i Niu Sila.
O se faailoga e atagia ai le lelei o le a‘oa‘oina o le gagana i le atunuu, a o lei malaga mai i Niu Sila le atalii ma lona aiga.
O le sa‘o o le faaleoina o upu, ma le gagana tautala o nisi ia o vaega sa faamasino agai i ai le tauvaga. O isi vaega sa agai sa faatāuaina i lauga e aofia ai le Folasaga, Faatinoga, Manatu, Gagana, O le leo atoa ai ma le faaaogāina o upu.
O le tuufaatasiga o vaega uma e pei ona ta‘ua, o le manumalo foi lea o le lauga ma le tautalaga.
O Hollyfield o ona matua e mai afioaga o Samata, Falelima, Falealupo i Samoa, ae o loo nonofo ma ona mātua i Otara i Aukilani i Saute.
O le atalii ia Venesi Pasolo o lona tamā o Toatele Pasolo, ma lona tina o Neituupo Pasolo mai Sapapalii i Savaii, Fasitootai ma Vailuutai i Upolu.
O se fiafiaga mo le aoga a Sir Edmond Hillary i Otara ona o le faaiuga matagofie sa manumaloina e sui o le aoga mo lea foi tauvaga tele.
O le taunuu ai o Hollyfield ma Venesi i le ofisa o le Samoa Times, sa fetaui lelei lava foi ma le taunuu i ai o le susuga ia Jack Apelu ma lana pine auro mai le tauvaga teuteu tino a le Asian Pacific lea sa malaga atu ai i Rarotonga.
Sa fiafia tele le fanau ina ua faatalofa ma feiloai ma lea foi tamalii tāua o le atunuu sa faamanuia mai lona taumafai i taaloga sa malaga atu ai. Atonu o se luitau tele foi lea ua totō i loto o le fanau i lea aso, i le tāua o le ola taumafai ma le filigā poo le ā lava le taleni ua faamanuiaina ai, o le a tauia lava. Manatua, e leai se seleselega pe a aunoa ma se luluga. O lē lulu ma loimata e selesele foi ma le fiafia.
O le tauvaga lauga faa-Samoa, o se faiga ua fesoasoani tele mo le atinaeina o le fanau laiti i le tulaga o le malamalama lelei ma le faaaogāina o le gagana i totonu o Niu Sila. E lē gata i lea, ae o se faamanatu tāua tele foi mo mātua ina ia tautata pea i le moa o le ala, i le a‘oa‘oina ma le tautalaina o le gagana Samoa i totonu o aiga, aoga, o lotu, atoa ai ma nofoaga faitele.
O le gagana Samoa, ona pau lea o lo tatou faailoilo e iloa ai tatou i totonu o soo se atunuu o le lalolagi, aemaise ai o lo tatou lava tofi lea mai le Atua.
