Na vaaia le atuatuvale ma le popole o le afioga Muagututagata Peter Ah Him, ina ua solomuli ese lana loia le susuga Patrick Fepulea‘i ua lē mafai ona tulai e finau lana talosaga apili faasaga i ona moliaga e lua na faamaonia e le faamasinoga maualuga lea na sala tupe ai i le aofaiga e $30,000 tala.
Na faatoa faaulu le apili a Muagututagata ae toe lua vaiaso amata galuega a le faamasinoga o talosaga toe iloilo le Court of Appeal. Toe lua masina mai le aso na lauina ai le faaiuga a le faamasinoga i moliaga o le aafia i faiga taufaasese o lea tamalii, ae tatala le avanoa e faaulu ai apili i le faamasinoga.
O le autu lea o le faaiuga a faamasino e toatolu o le faamasinoga apili e lē talia le talosaga a Patrick Fepulea‘i e tolo le apili a Mugututagata se‘i fofogaina i le isi tauaofiaga a le faamasinoga apili i le masina o Novema o le tausaga nei. Na faaalia e alii faamasino e tele le taimi sa tatau ai ona lava tapena le alii loia.
Peitai sa talosagaina le alii loia i se manaoga o faamasino pe mafai ona alala ai pea i le faamasinoga ma fesoasoani ia Muagututagata ae o le a faagasolo iloiloga a le faamasinoga, peitai e lei talia e le alii loia lea manao ma tulai ese ai.
O le taimi lea na afio ane ai Muagututagata i luma ma faaauau lana mataupu lea na ia faaalia ai lona faanoanoa, pe faapefea ona ia finauina lana apili e aunoa ma se loia. Sa ia augani foi mo se avanoa e toe faataatia ai lana mataupu ae se‘i sue se loia, peitai e tasi lava le faaiuga a faamasino e lē mafai.
Na faaauau ai lava lea o iloiloga ma tuu fesilisili alii faamasino i le afioga i le tamalii i vaega sa fia maua ai sona finagalo faasino i le suesueina o ona moliaga ma le faaiuga na faia e le faamasinoga maualuga.
O le taunuuga o le popole o Mugututagata i le leai o sana loia, na tali mai i le iuga o lana apili ua faaleaoga ai le tasi o ona moliaga ae tumau le isi moliaga ma ua faaitiitia ai ma lana salatupe.
O le faaiuga ua iai nei e na o le $20,000 lana sala tupe ina ua faaleaoga le isi moliaga ma le sala tupe e sefulu afe.
O lona uiga o le a toe faafoi lea seleni i le tamalii. O se tulaga ese lea i le molimauina o lenei mataupu ona sa teena e faamasinoga le talosaga e tolopo le apili, ae sa silafia foi e faamasino o loo naunau Muagututagata e finau lana apili, lea sa fesoasoani i ai alii faamasino e faamatalata nisi o vaega tāua e ao ona avatu i ai sona finagalo e faavae i le tuuina atu o lana apili e soloia ai ona moliaga.
E ui e tasi le solitulafono o loo faamaonia pea, le moliaga lea o le aafia i ni faiga solitulafono i le toe suia o faamaumauga, peitai o se ‘ai mo lea tamalii lana finauga ona ua soloia le isi moliaga.
