O le vaiaso o le masina o Me 2015 e amatalia i le aso 23 o le a toe valaauina ai i le Faamasinoga Maualuga le talosaga a le susuga i le faifeau o Kerita Reupena e ala i le tamaitai loia le afioga Leulua‘ialii Olinda Woodroffe.
O le talosaga lenei ia faia ai se poloaiga lē tumau a le faamasinoga e taofia ai le faaiuga ua faia e le komiti a le au toeaina o le EFKS ua aveesea ai tofi o le faifeau le susuga Kerita. O le Aso Faraile ua mavae, 17 o Aperila 2015 na toe fofogaina ai i le valaauga faalua lenei mataupu. Peitai sa tulai mai ai ni finauga i le va o le Faamasino Sili ma le loia a le faifeau ona o nisi o vaega sa lē manatu le faamasinoga e faatino e le itu talosaga.
O le vaega lea i le samania o faifeau toeaina o le ekalesia ona sa faaalia e le Faamasino Sili, o le fofogaina muamua o le mataupu e leai sana faaaliga na faia e samania ai faifeau toeaina, ae ua te‘i i le valaau o le mataupu i le Aso Faraile ua mavae ae faailoa atu e le loia a le itu talosaga e toafā faifeau toeaina e lei mafai ona maua ae o isi uma o loo ua maua tusi valaau.
O lea la ua faatonuina e le faamasinoga le itu talosaga e tatau ona maua uma isi faifeau toeaina e toafā e aofia ai ma le taitaifono o le komiti a le au toeaina le susuga Toese Peleti Toailoa o loo galue i Sini i Ausetalia, o ia lea o loo autu i ai le mataupu ona ua lē mafai e le itu talosaga ona faatūtū le mataupu i le ekalesia EFKS poo le Congregational Christian Church of Samoa le CCCS.
I le feiloaiga ma le tamaitai loia mo le susuga Kerita Reupena, le afioga Leulua‘ialii Olinda na ia faamatala ai lona faanoanoa tele i le silasila a le faamasinoga i le mataupu, ma le toso faaumiumi ae o i latou o loo sili ona mafatia i le fia maua o se tali o le talosaga o le faifeau ma tagata lotu o lana ekalesia i Ausetalia.
O loo faanoanoa foi le loia ona o le lē talia e le faamasino sili o lana finauga e mafai ona faatūtū lana talosaga i le ekalesia ona o loo talafeagai ma aiaiga o le faavae o le Malo o Samoa. O le fetosoa‘ina o lenei mataupu ua taoto mai ai se lagona ua a‘e i le faafeagaiga e ana le talosaga, pe ua lē tatau ona toe soalaupule le mataupu i totonu o le lotoifale o le komiti a le autoeaina.
Faaalia e Leulua‘ialii Olinda o le lagona lea o le susuga Kerita, ae o le faalavelave o loo faauliulito pea le finagalo o le au toeaina e faatumau le latou faaiuga. Sa naunau le itu talosaga e fofogaina ma maua se finagalo o le faamasinoga a o lei usuia le fono tele i Malua i le masina fou, ae ua manino mai ua lē maua lea tulaga pe a fua i le vaiaso mulimuli o Me ua toe tolopo i ai.
