Ua mautinoa o ia le tina aupito matua o Samoa o loo soifua pea. E nofo lava i autafa o le malumalu a le Ekalesia Faapotopotoga Kerisiano Samoa i le afioaga o Afega ae o le malosi o lona mafaufau le tulaga e maofa tele ai.
O lona aso soifua na malaga mai ai mai Niu Sila lana tama teine e toatasi o loo soifua pea e suafa ia Taisia. O lana ulumatua lea e 83 tausaga o lona soifua ma e manino le malosi o le loomatua e foliga mai e matua ai lana tama teine.
O Taisia Mitavale Siaosi Tita‘i, o lona tamā e mai Saleaula ae o lona tina e mai i Safai. O le tele o lona olaga na nofo ai i le aiga o lona toalua i Afega ma o iina o loo iai pea i le taimi lenei.
Faaalia e lenei tina o lona olaga e lē malolo, e amata usu i le sami e fagota, sa fai foi lana maumaga ma o tupe na te maua i nei galuega na tausi ai lona aiga mai lava i le talavou seia oo lava ina matutua.
Faaalia e lana fanau o le sami lava na ola mai ai ma o iina lava na tele i ai le olaga o le tina.
Ua maliliu uma lana fanau se‘i vaganā ai lana tama teine ua silia i le 83 tausaga le matua. E ese foi le faamanatuina o lenei aso fanau.
O le tele o taimi o molimau e na o le fetagisi lava o fanau a lenei tina, o fanau a ana fanau, fanau a fanau a ana fanau (great grandchildren) ma le augatupulaga sosoo ane ai.
E fetagisi fanau ae o le loomatua e foliga ita, e fai lava ma fesili pe ua uma le lotu. E gaioi solo i luga o lana nofoa faataavalevale ae e fai ma faatu i luga, ona siva mai lea i le nofoaga o loo iai tusitala.
Se‘i vaganā ai lana faalogo ua lē lelei, ae o mea uma lava mai i lona mafaufau e oo i lana tautala e manino.
E manatua foi le tele o suiga o lona olaga ma lana fanau. E fai fai lava ana faamatalaga i le lē faamaoni o lona toalua i le la mafutaga ae o loo nofo pea i le aiga o lona toalua.
O lana mau ua fia malolo, ma na ia faapea mai ua fiu foi e tatalo i le Atua e faamalolo atu o ia ona e tiga uma vaega o lona tino. Amata mai i lona muaulu seia paia ona tamatamaivae.
E mālie lava ona uiga ma ua fai mai e lē iloa poo le lē malolo a o talavou lea ua mafua ai le tiga o ona tino. E ui i ia manaoga e vaaia lava le māfana o lana mafutaga ma fanau a ana fanau ia ua tausia ia i Afega.
Sa toatele lava foi i ana fanau lona aso faamanatu. O le faafetai a le fanau o le maua pea o le mafutaga ma o faamanuiaga ia o i latou o le mafuta pea ma le tina ia Mitavale poo Taisia foi.
E iai vaega e lē manao le loomatua e oo i ai se faamatalaga umi aemaise le toe “tanu e ia o lana fanau”. Na ia ta‘ua e tatau ona tanu ia e lana fanau ae ua uma atu lava ona alo o ia falelauasi ona o le matua ua iai nei.
O le taimi lenei ua fā augatupulaga a le tina (great great grandmother) ae e lei mautu lava se aofai o tagata ua tupuga mai ia te ia.
