O le toe faafouga o le soifua faaleagaga o le toe faaopoopoina lea o le malosi faaleagaga, o taimi sili ia ona tāua e toe faalatalata ai le mafutaga a le tagata ma Iesu le Faaola.
Na gasolosolo lelei le Revival a le autalavou a le Matagaluega Aso Fitu Samoa Tutoatasi na amata mai i le po o le Aso Gafua 5 o Aukuso. E lē gata i le faatinoina o tala ma polokalame faitaga, o pese aemaise o lauga, e fatufatu ai lagona o tupulaga talavou sa avea ai i latou o ē taulamua ma taitaia ia sauniga tāua i po taitasi.
O le uluai po na faaautūina, “O le tāua o le Tusi Paia e sili i tusi uma”. O le po lona (2) “Paoa o lau filifiliga”. Po lona (3) “Faaolataga”. Po lona (4) “O le Upu moni”.
Ua toe tasi le vaiaso ma e talitonu ua saosaoa lava le fili ma ana mailei i lenei vaitaimi i le taumafai e tatai atu mafaufau o tupulaga i mea faafiafia aemaise o le tele o auala e fano ai.
Momoli le agaga faafetai i le faatamā ia Setiu ma le auofisa, faapea le taitai, faletua ia Ianeta Tuiā, le sui taitai le faletua ia Emo Matai‘a; le failautusi o le talavou ia Kay Euese ma le fesoasoani o le talavou ia Matagi Levae ua a‘e ai se tofa e faaavaava nei taimi
e toe faafou ai ma faateleina pea le taimi mo le Alii.
