“E moni lava sa aumau ma nonofo i le tele o tausaga i fafo, ae sa soifua uma a‘e lava i Samoa”
Tusia: Autagavaia Tipi Autagavaia
Samoa
O lana afioga i le Ao Mamalu o le Malo le afioga Tui Atua Tupua Tamasese Efi ma lana masiofo o Filifilia Tamasese, na faatumutumu i ai mamalu ma paia eseese sa auai i toe sauniga o le tina o Tualasea Tinei Valelia Faofua, ma ona tuagane o Tautiauli Tuala Manuele Alefosio, Toleafoa Paulo Alesana, ma Atonio Luki Alefosio i le malumalu o le ekalesia Katoliko i Lotoso‘a Saleimoa i le Aso Lua na tea nei i Samoa.
O se sauniga na ufitia i lagona o le loto faavauvau ma lagona o le loto nutimomoia aemaise o le loifofoga maligi. O le auai o lana afioga i le Ao mamalu ma lana masiofo ona o sootaga faaleaiga, ae o le fia faaalia foi o le faanoanoa faatasi ma alo ma fanau ma aiga e fia e faasino ia i latou ua maliliu ona o le faalavelave e pei ona silafia e lo tatou atunuu.
Na malaga faapitoa mai Amerika sui o le fitafita o le maligi a lea Malo ona o se tasi o i latou ua maliu o se tuagane ma se uso sa tautua i lea vaegaau a Amerika i le tele o tausaga.
O le tagavai foi o lea Malo sa ufi ai lona sa, o se faaaloalo maualuga lea faalemalo.
O le maliliu o le toafā o ni tagata o se aiga o se fanau mai se aiga e tasi, e talitonu le toatele o se taimi muamua lea ua aafia ai se aiga o lo tatou atunuu i se faalavelave faapea. E ese mai le faalavelave matautia faalenatura le sunami i le tausaga e 2009 lea e toatele foi nisi o sui o aiga o nuu na aafia i lea faalavelave na ma‘umau ai soifua. O le tumutumu ai o le toatele o le atunuu e molimauina toe sauniga o sui o lea aiga e ese mai lava i tagata o le aiga, o se pine lea o le taufai lagona e le atunuu o le loto alofa ona o ē pele aemaise o mātua mo fanau ua tuua na o latou ma o latou tina, ma le tamā matua, le toalua o le tina o Valelia.
O se faailoga lea o le agaga moni faasamoa o le tuufaatasi o loto ma agaga e momoli atu ai alofaaga ma faamaisega i nisi o le atunuu ua afea faafuasei e le maliu ma le oti ona o faalavelave e tatou te momoe ma manū, ae sau mala e atia‘e. Ia manuia le malaga mo le tina ma ona tuagane ma ia maua se nofoaga mau i le nuu ua saunia mo i tatou uma.
