24 faaeaina i le tusipasi mo suesuega faakerisiano – LOGOS

E to‘a 24 alii ma tamaitai ma atunuu eseese ma talaaga eseese ua faaiuina manuia a latou aoaoga sa feagai ai mo le sailiga o le tusipasi i suesuega o mataupu faakerisiano, i se tasi o polokalame tau aoaoga a le BEST Training, le LOGOS, poo le aoga mo suesuega faakerisiano.
O se afiafi o le tele o siuleo fiafia ma le faagaeetia, a o feofoofoai le aufaauu ma o latou aiga, o uo ma ē na valaaulia, aemaise o latou taitai faaleaoaoga sa nafa ma le galuega fita, lea ua faauu mai ai ma le tusipasi, Certificate in Christian Studies Level 3.
O le sini autū o nei suesuega faakerisiano, ina ia maua e i latou uma o loo iai i nei aoaoga se fesoaosani mo le faamalamalamaina atili i le tele o taiala faaletusipaia, e limataitaia ai o latou olaga ina ia matuā faakerisianoina, ma avea ai foi ma aafiaga lelei i isi tagata i le olaga o aso faisoo.
O le afiafi o le Aso Faraile talu ai, 9 Aukuso i le Manhattan Catering & Function Centre i Mt Roskill, sa faatautaia ai lenei faauuga. O le susuga i le Faafeagaiga, Rev Maafala Koko, na saunia taitaia le faamoemoe i se upu mai le afioga a le Atua. O Rev Maafala o ia o se tasi o sui faavae o le Komiti Faafoe na amataina mai lenei aoga, ae lei leva tele atu na faamavae ai le susuga i le alii faifeau.
Sa faaleo foi ni upu faamalo ma le faafetai a le tamaitai pule sili ma o ia foi na faavaeina maia le BEST Training, le faletua ia Anita Finnigan, aemaise le saunoaga a le Taitaifono o le Komiti Faafoe a le LOGOS, le susuga Rev Alesana Fuimaono McCarthy ma faagasolo ai loa le polokalame faatulagaina o lea afiafi.
O le alii lakapi tautaua a le All Blacks, o se alo o Samoa, le susuga ia Laauli Michael Jones sa avea ma failauga autū o le afiafi. Na faafiafia foi le Adeaze, o nisi foi alo o Samoa, e tovā ai le faagalosoga o le polokalame, ma nisi o faafiafiaga faaleagaga.
Na matagofie tapenaga uma sa alo i ai le aufaigaluega atoa a le LOGOS, ma na matuā faamalieina aiga uma na auai atu aemaise le auvalaaulia, e lē gata i faafiafiaga na saunia, o upu faalaeiau sa fofogaina e sui na maua avanoa mo lauga, aemaise ai lava le itu foi i le taumafataga.