Valaaulia le Kovana o Niu Sau Uelese mo le leitio FM89.3

Ua valaaulia aloaia nei le Afioga i le tamaitai kovana o Niu Sau Uelese, Professor Marie Bashir e tatala aloaia le maota fou o le leitio logologoā i Liverpool, Sini le FM89.3 2GLF. O le amataga o le tausaga nei na siitia mai ai lo latou ofisa tuai i le 303 Macquarie Street mai Liverpool lava lea na tautua ai mo le tolusefulu (30) tausaga talu ai.
O le aso tonu o le faiga palota tele a Ausetalia, 7 o Setema 2013 o le a ooti ai le lipine o le faamanatuina o le tolusefulu tausaga o le FM89.3 a Sini ma lona ofisa fou e le Tamaitai Kovana i le itula e 1pm. O le itula e 7pm i lea lava aso o le a amatalia ai se fiafia tele i le Maota o le Assyrian Sydney Club i Horsley Park e sami ai lea itulau fou o le auaunaga. O loo fuafua o le taimi tonu lea e oo atu ai ua maua se iuga o le faigapalota tele ma sami faatasi atu ai le Itu ua manumalo.
Faaalia e le Faatonu o le Samoa Sportstar Show o loo avanoa isi taimi mo nisi e fia faatautaia ni a latou polokalame Samoa ma le Pasefika. “Pau le tulaga e moomia o le talosaga faatasi ma se ata faataitai o polokalame fou mo le lua itula, a talia e tatau ona faia loa aoaoga i le faaaogāina o masini faaneionapo ma itu tau le tulafono e limataitaiina ai sui.”
O le mae‘a o nei tapenaga o le a mafai ai loa ona amatalia a latou polokalame fou. E mafai ona faalogologo mai aiga i Samoa, Niu Sila, Hawaii, Amerika ma soo se itu o le lalolagi i luga o le upega tafailagi o le www.893fm.com.au i le itula 2pm i Aso Lua. E lē gata i lea e mafai ona toe faalogologo i polokalame tuai e fā (4) ua tuanai pe a oomi le faamau o le “ON DEMAND” i luga o le upega tafailagi. E aoga lea mo soo se tasi na misia polokalame tuai aemaise numera o telefoni a kamupani ma aso o mafutaga, siva ma fono. O le tautua matavela a lea alaleo i tagatānuu o Sini mai le tolusefulu tausaga talu ona amata, ua fai lea ma maa faamanatu ia i latou na amata mai o talavou a o lenei ua amata litaea mai galuega faapea i latou na galulue ma ua faasolo pulapula lagoto lo latou soifua. O se leitio foi e lē gata o le gagana peretania, talafou ma pesepesega mālie e faasalalauina ai, ae tele ma felanulanuai gagana o loo faafoe ai a latou polokalame e ala i la latou tautua. O polokalame Samoa o loo faasalalauina i luga o lea alaleo e aofia ai le ‘Toe Afio Mai’ e faatautaia e le ekalesia Aso Fitu.
O le susuga a Eti Faiaoga o loo avea ma Faatonu o lea Polokalame i taeao o Aso Toonai mai le itula e ono. O le Samoa Sportstar Show e amatalia i Aso Lua taitasi mai le itula e lua o loo faafoeina e le Afioga Leaupepe Matautu ma Leilua Jerry Uesele. E pei ona silafia o le Polokalame Samoa Sportstar i Aso Lua taitasi e amatalia pe a taualuga le Samoa Laalaa mai le  sefululua i le aoauli i luga o le FM99.9 lea e toalua mai ai Lealaifola Lauvale Su‘a, Fata Pati Masini ma Fotualii Afele Schwenke. O lenei lava alaleo na faafofoga i ai le atunuu i Sini nei ma faatalatalanoaga tuusa‘o ma le autaalo a Samoa i le Olimipeka i Lonetona, malaga mai a le Palemia ma le HRPP, aemaise le Manu Samoa ma lana taitoafitu logologoā.