Na mataina sikoa a sui o le Newcastle Knights ia Joey Leilua ma David Faalogo i lana manumalo mataina e 22 i le 12 a le West Tigers lea na masii atu i Hunters Stadium e feiloai ma le Knights lea ua lima taaloga sosoo o faia‘ina lava. O isi sikoa e lua a le Knights na maua lea e James McManus ma Chad Redman, ae o le Tigers o Dene Halatau ma Luke Brooks lea e ta le ‘afa o sili le Newcastle.
Na toe vaaia foi le agavaa o Sione Matautia i le malosi o lona tauaveina o le polo ae lei sikoa muamua McManus. Na semanu e sikoa foi Tariq Sims o le Knights lea sa taalo mo Fiti ae peitai na mamulu le polo mai le toe pue mai a le Tigers i luga o le laina.
O sikoa e lua a le Tigers na maua e Halatau aemaise Luke Brooks na sikoa ina ua paso le au a Newcastle i se pomu i luma o le fu‘a tulimanu na toe fiti mai le polo ma sokasoka atu ai e Tadescao ma Brooks lea na faapalasi ai loa mo le sikoa. Na tausinio uma nei au ia manumalo e fafagu ai i luga la latou taamilosaga ua tele faia‘ina.
Na matuā ita le faiaoga o le Tigers ia Jason Taylor i le leaga o le togiina o polo e la latou ‘afa i sikalamu lea sa leiloa ai le polo i le tele o taimi faaopoopo i ai ma mea sese i le ‘afa faaiu.
O se tasi lenei o auala na faia‘ina soo ai le ‘au e pei o le toe fao e le Knights o le sikalamu a Tiger i le taimi lea na palasi ai le polo ia Gagai toe fitu minute. Talitonu Taylor ana maua la latou polo i le sikalamu lea na fao e le Tigers e telē se avanoa e ono manumalo ai.
Ae peitai o se vaaiga fiafia na tulai mai i le sikoa a BJ Leilua i le minute 54 o le taaloga lea na sikoa ai le sui o le Toa Samoa ma amata faaali ai ana taga onomea i Siva faaneionapo a o tuliloa atu e mea pueata ma alalaga fiafia atu ai la latou autapuai na molimauina lenei taaloga.
