Na taualuga ma le faanoanoa le taumafaiga a le taitoafitu a le Manu Samoa i le vae mulimuli i Lonetona o le tauvaga 2015 ina ua faaiu i le malolo e 37-7 ia Kenya i le tauvaga o le Semifinal o le Bowl poo le ifu faaofuofu.
E ui na manumalo i le quarterfinal ia Portugal i le 33-14 na vaaia le malosi o Kenya i le semi.
Sa faapea o le a toe ausia le manumalo i le tauvaga o le Bowl e pei ona iai i le vaiaso atu i tua i Sikotilani ae pagā lea sa lei taunuu. Ua atagia nei e lua lava vaega o le a sailia nei e le Manu Samoa, o le suia o le pulega poo le sailia loa o ni tama fou e atinae mo le 2016 ma le Olimipeka faapea tausaga o i luma.
O le siamupini o le Ipu Mafolafola poo le Plate na sola lea ma Iapani lea foi sa manumalo i le Manu Samoa i nisi tauvaga o le 2015.
E lē o se tulaga lelei lenei mo le alo atu a le Taitoafitu mo le Olimipeka i Brazil 2016 auā o le a faigata se toe sailia o le avanoa e auala atu i isi faaitulagi ma ana tauvaga.
I le tauvaga o le Ipu autu na faateia nisi i le sao atu o Amerika poo le Aeto i le sailia o le fusi autu ma Ausetalia lea na lami i le 33-7 a Fiti i le semifinal muamua ae manumalo maoae foi le Aeto a Amerika e 43-12 a Egelani.
O le taimi muamua lea faatoa toe oo ai Amerika i se suega siamupini autu o le Ipu talu mai le 2010 lea na fetaui ai ma sola ai le Manu Samoa ma le siamupini i Adelaide.
O Ausetalia foi faatoa toe oo foi lea i se sailiga siamupini talu ona suia le faiaoga tuai ia Michael Connor.
E ui foi na faia‘ina Fiti i le Semi ia Ausetalia ae na faapea lava ona tauaao i ai le fusi aoao o le tauvaga atoa o le 2015 lea ua toe suipi ai Fiti.
O nisi o alo iloga o Samoa i le au lenei a Ausetalia e aofia ai Pama Fou faapea Allan Faalavaau, ma o le a sauni atu nei e talimalo ma le toafitu a Ausetalia mo le tauvaga o le 2016 lea e faia mai i Sini le tauvaga i le aso 6 & 7 o Fepuari 2016.
