A mālie se pese e tosina ai loto ua galala i le mafatia ae sili ai ona faaolaina se agaga ua faanoanoa pe a faafofoga i viiga o le Atua.
O le lauga foi a le pese na te momolia se vai mālū i se finagalo ua matelaina i le fia taumafa ona o le saosaoa o faiga a le fili ma ana faaosoosoga.
O le lua ai nei o tausaga talu ona faagasolo mai tauvaga pese a le leitio o le Penina o Asuisui e pei ona amata i le tausaga e 2013, lea e tailua tausaga ma faia.
E fitu foi aufaipese na tauva i lena taimi ma e ova atu i le afe tagata sa molimauina lea foi tauvaga o viiviiga o le Atua. E momoli le agaga faafetai i Ekalesia ma aufaipese i lo latou tali mai e tusa o le faatalauula atu a lenei leitio faatauvaa ma ana fuafuaga auā lava le tautuaina o le atunuu.
O le faasologa o aufaipese mo lea tauvaga i le masina o Setema
Aufaipese muamua e oo i le fitu:
1. Ekalesia Evagelia Uesiliana Metotisi a Kuiniselani
2. Matagaluega a Browns Palins Ekalesia Metotisi
3. Matagaluega Camira Ekalesia Metotisi Faasinoti
4. Ekalesia Aso Fitu o le Toe Afio Mai Dbay
5. EFKS Southwest Brisbane
6. Matagaluega Logan City Faasinoti
7. EFKS Logan City Matagaluega Kuiniselani Saute
Ua faamoemoe e toatolu faamasino o le tauvaga, toatasi mai Aukilani NZ, ma le toalua mai Melepone.
O faailoga o lea tauvaga o le a fuafua, o le Manumalo e $3,000.00 ma le Ipu faatasi ai ma le Ipu tuufaasolo o le manumalo; Tulaga lua e $2,000.00 ma le Ipu; Tulaga tolu e $1,000.00, ma faasolo mai ai lava ina ia laugatasia pe tofusia uma aufaipese i faailoga tupe ma Ipu.
Faafetai i kamupani o loo fesoasoani mo le faatupeina o lenei faamoemoe ma o le tatalo i le Atua ia taulau ma iu manuia ma ia maualuga ai pea Lona viiga e faavavau lava.
