Ua logo itu e fā o le kelope ina ua salalau le talalelei o galuega mae‘ae‘a o gapātia ai taitai ma faauluuluga o le galuega Faaautalavou ma Aoga Sa e pei ona faasavali ai Semina i le tele o aulotu a le Ekalesia faapea atunuu e pei o Samoa, Niu Sila ma Ausetalia.
O se vaiaso o faamanuiaga i le Faasinoti a Kuiniselani a o faapea ona afea e le faigamalaga mai Samoa, le Faatonu o A‘oa‘oga Kerisiano a le Ekalesia Aoao Metotisi (autalvou & aoga Aso Sa) susuga ia Rev Koneferenisi Tu‘ai Aufai faapea le Tulitulimatagau le susuga ia Rev Pole‘a Tonise, ma faifeau e toalua susuga ia Talafou Seiuli ma Taeano Amani na malaga mai.
O le autū o le malaga mai o le faia lea o se semina faaautalavou ma aoga Aso Sa faapea failauga o le Talalelei ma Taitai o le Ekalesia, o i latou nei sa auai uma i le Semina faapitoa na amataina i le po o le Aso Tofi aso 9 o Fepuari sa faia i le Matagaluega a Petrie, susuga ia James Matamua ma le Ekalesia.
O le po o le Aso Faraile sa toe faia ai le isi semina i le Ekalesia a Akesa, susuga ia Rev Siologa Mapuilesua ma le la itu atoa.
O le Aso Toonai na tuufaatasia uma ai failauga, taitai ma aoga Aso Sa, faapea tausimatagaluega ma i latou uma na mafai ona auai atu i le Semina sa faia i le matagaluega a Inala, le susuga ia Rev Laauli Leiataua.
Sa talimalo le aao tusitusi o le Faasinoti le susuga ia Rev Ioane Tuupo ma le faletua ma Matagaluega a Logan City i le faatonu o aoga Aso Sa mai Samoa, Rev Koneferenisi Tu‘ai Aufai faapea nisi o Ekalesia sa talimalo ai i le isi vaega o le faigamalaga.
E lololo ma suamalie i finagalo le tele o mataupu ‘anoa ma le tāua sa talanoaina auā le agai i luma o autalavou ma aoga Aso Sa ma le tele o matagaluega a le Ekalesia Aoao.
O le Aso Sa lona 2 o Fepuari sa maua ai ni avanoa faaauro e lauga ai Faifeau nei na malaga mai e folafola le upu o le Ola i aulotu sa api ai.
Matagofie le felanulanuai o taumafa faaleagaga sa lufilufiina e le aufaigaluega a o iai i Kuiniselani.
O le afiafi o le Aso Sa na tuufaatasia ai le faasinoti i se faamavaega ma le aumalaga a o lei tuuvaa atu mo le Semina tele i Melepone ma faasolo atu ai i le Setete o Niu Sa Uelese (NSW).
Ua mae‘a Semina i Samoa atoa ma Tutuila agai ane ai i Aukilani, Ueligitone ma Kalaiesetete ma nisi o aai i Niu Sila a o lei agai mai i Kuiniselani.
E iai le talitonuga e toe taliu i Samoa fuafua ai le malaga mo Amerika e faaauau ai pea nei semina faapitoa.
Mo le silafia ai e nisi o Faasinoti e ese mai i Kuiniselani, o loo solosolo lelei ma manuia le Faasinoti Ekalesia Metotisi i Kuiniselani amata mai i le afioga i le Sea ia Soofa Mulipola ma le faletua ia Logotaeao, le failatusi ia Rev Ioane Tuupo ma le faletua faapea nofoatoo ma le paia i Tausi Matagaluega ma Faletua, le loaloa o le Faasinoti, Auso, faapea autalavou ma aoga Aso Sa ma soo se vaega.
O loo maua pea le fesootaiga vavalata i soo se vaega e fia faalauiloa auā le nofosilafia e le lautele o Ekalesia i le lalolagi e tauala mai lea i le galuega mae‘ae‘a a le Aao Tusitusi o le Faasinoti, le susuga ia Rev Ioane Tuupo.
