E tasi le afe tala le salatupe ua faia e le Komisi e pulea tagata faigaluega a le Malo (Public Service Commission) i se tasi o Pule sili lagolago o le Matagaluega o Tina ma Tamaitai Atina‘e o Nuu ma Afioaga ma Aga Fesootai, ina ua faamaonia i suesuega lona aafia i se gaioiga ua solia ai aiaiga o tulafono o tagata faigaluega a le Malo.
E mafua lea ona o ni tuuaiga i le saini o suafa o nisi tagata i ni seleni ae lē o tagata moni ia na latou sainia ia seleni.
O tua atu o ia suesuega poo ai na faaaogāina ia tupe e lē o iloa. O le faasalaga ua faia e le Komisi e pulea tagata faigaluega a le Malo ua lē gata ina faia se sala tupe ae ua ave ma le lapataiga mulimuli i le pule sili lagolago poo se final warning.
E lua vaega sa ave ai le fautuaga a le pule sili o le matagaluega i lana lipoti i le taunuuga o suesuega na faia i le mataupu, o le sala tupe poo le faamuta o le auaunaga i le galuega a lē sa tuuaia, peitai ua aapa le komisi i le faasalaga tupe ma faia ai ma le lapataiga e lē toe iai se isi avanoa pe a toe aafia lē ua tuuaia i se isi gaioiga faapea.
Ua aiaia faasalaga mo tagata faigaluega a le Malo i ni faaletonu e tulai mai i le faatinoga o o latou tiute ma o faasalaga ia e faia i ai le faaiuga a le Komisi.
O nisi o mataupu e aafia ai tupe a le Malo ma le atunuu sa tuuaia ai nisi tagata faigaluega i nisi o matagaluega ma faalapotopotoga a le Malo na oo i le tulafono ma ua mae‘a faia i ai faaiuga a le faamasinoga.
O se isi mataupu sa tuuaia ai se tagata faigaluega sinia sa galue i le ofisa o le Tiute i le Matagaluega o Tupe Maua, e oo mai i le taimi nei e lei faatinoina le fautuaga a le komisi na tuuina atu i le ofisa o le Loia Sili, ina ia faatino auala faaletulafono e mafai ai ona toe aumai i Samoa lea tagata faigaluega mai Niu Sila e tali i tuuaiga e faasino i ni seleni sa aafia i le faatinoga o ona tiute.
O le taimi mulimuli na fesootai atu ai i le Loia Sili faatatau i lenei mataupu, o se vaitaimi o le tausaga ua mavae.
Na faailoa mai ai o loo faia fesootaiga i tulaga faavaomalo e toe aumai ai i Samoa lē o loo tuuaia. Talu mai le tausaga ua mavae e oo mai i le amataga o le tausaga nei, e lei toe maua mai se faamatalaga poo fea ua agai i ai ia fesootaiga.
O nisi o faaletonu tau tupe sa aafia ai nisi o lea ofisa ua mae‘a ona suesueina e leoleo ma molia ai nisi lea ua mae‘a faia i ai faasalaga a le faamasinoga, ae o le mataupu e pei ona manaomia ai se tasi sa umia se tulaga sinia lea ua aumau i fafo, e lei faia i ai se faaiuga.
