O le vaiaso na tea nei sa faamauina ai i lipoti faalevaiaso a le Matagaluega o Leoleo ma Falepuipui, e toalua tagata na lipoti atu ua leiloa e o latou aiga.
O le tasi o se tama talavou e 14 tausaga na lipotia atu e lona aiga, ua leiloa i le mae‘a ai o le faaiuga atoa o le vaiaso e lei foi atu i le aiga ae na usu i le aoga.
O le oo atu o le aiga i le Ofisa o Leoleo na ta‘ua e le Komesina Lagolago o Leoleo, Leaupepe Fatu Pula, na fesiligia lava pe ua uma ona sailiili mae‘ae‘a poo fea o iai le tama ua leiloa.
O le faamatalaga a le aiga na ta‘ua e Leaupepe ua matuā fiu e sue ma ua leai lava se fesootaiga ma le tamaititi.
Na agai loa leoleo ma e mae‘a le aso ae maua loa o loo nofo le tamaititi lea i se tasi o fale i totonu lava o le afioaga o loo nonofo ai ma ona mātua.
E leai foi ma se tali ina ua fesiligia pe aisea ua lē logo ai lona aiga o loo i totonu lava o le nuu ae ua ese le aiga lea ua nofo ai.
Na toe faafoi e leoleo i lona aiga ma fautuaina mātua e saili lelei ma ia maua se fesootaiga ma le la tama a o lei agai atu i le Ofisa o Leoleo.
O le isi tagata na lipoti atu ua leiloa, o se alii e 40 tausaga le matua na alu lava e faigaluega i le Aso Faraile e lei toe foi ane lava i lona aiga. Na oo i le Aso Gafua o le vaiaso na tea nei ae agai atu loa le tina o le aiga e fia maua se fesoasoani a le Ofisa o Leoleo.
Faaalia e lea tina e lei toe maua lava se fesootaiga ma lona toalua talu le Aso Faraile lea na alu ai, ma ua fiu foi e tau telefoni i ai ua lē ola le telefoni. Saili foi lea o Leoleo ae maua ane i le Aso Gafua lava lea o loo nofo lelei lava lenei alii i se fale o sana uo tama ma o le faamatalaga na avane i Leoleo, o lea na alu e tafao ai i lana uo, ua moomia se taimi mo ia lava ia ona ua fia mafuta ese ma lona toalua ma lana fanau e toalua.
Faaalia e Leaupepe, e tele naua le taimi o Leoleo e faia ai nei sailiga ma o se galuega e fai o le toatele o leoleo e valaauina e tuu tiute masani ae agai ane e saili nei tagata ae ua toatele lava ua lipotia le leiloloa ae mae‘a ane o loo agai lava e saili nisi nofoaga e mapu ai mo sina taimi toe agai ai loa i aiga.
Atonu e faigata ona faamalamalama i le atunuu lea tulaga ona o le mau lava lea o le matafaioi lava a Leoleo o le fesoasoani pe a tapa atu le atunuu e saili aiga ua leiloloa aemaise lava pe a tulai mai o fanau ua leiloloa.
O le fautuaga foi la ua ave i le alii na sola ese mai i le toalua, taumafai e faaleleia fesootaiga ma le toalua ae lē na o le tulai atu lava alu ese e aunoa ma se faamatalaga ona o loo popole le toalua ma le fanau.
O le fautuaga foi lea na ta‘ua e Leaupepe ua ave foi i le tama aoga lea na tauanau e toe foi i le aiga.
O isi tagi ua tuuina atu i le Ofisa o Leoleo e tele ina fautuaina le mamalu o le atunuu e toe mafaufau lelei i ai a o lei faatautaia o tagi ia i feeseeseaiga i le va o ulugalii. Faaalia e le Vaega o loo feagai ma Mataupu tau i aiga ma sauaga e ono tulai mai ai, e lē asa se aso e oo atu ai tamaitai poo tina e faaulu tagi faasaga i taitoalua ona o le faasuaava ma iu ai ina vevesi poo le vevesi foi i le faasoa i totonu o le aiga.
“O le tele o taimi e fautuaina lava tina pe iai se manaoga e faatalatalanoa e leoleo le mataupu ma taitoalua ae leai lava e mananao lava e faaulu a latou tagi,” o se faaaliga lea i se faatalatanoaga ma le tamaitai o loo faauluulu i ai lea vaega o le auaunaga faaleoleo, o Sina Tafua i se taimi ua tuanai.
O le faamatalaga a lea Taitai Leoleo, e mae‘a suesuega ma faatalatalanoaga ua tuu atu loa tagi nei i le Faamasinoga ae toe agai atu tina nei ma toe talosaga le ave i tua.
O le taimi lenei i le faatalatanoaga o teuteuga o Tulafono, o se tasi lenei o mataupu ua finau nei leoleo ina ia iai se teuteuga e faamautu ai.
O le faamalosia lea o le faataunuu o tagi nei ina ia mae‘a lelei lava faamasinoga e faia i ai auā e alu le taimi tele o leoleo e faatino, i le mae‘a ai lea ona lapatai ma fautua ae e mae‘a ane lava ua tele mataupu ua toe faaui i tua ona ua toe agai atu lava tina e tatala i tua ia talosaga.
“O le loto ita lava o tina i lea taimi ae e taumafai lava la e faamalamalama i tina e lē o toe mafai lava ona tatala i tua ni tagi se‘i vaganā ua sau le faatonuga a le Faamasinoga – ona ioe lava lea ae e toe foi atu lava le silia i le 90% ma talosaga le toe ave i tua o nei talosaga ae o lea ua matuā tele le taimi ma le malosi o leoleo ua alu ai ina ia faataunuu lava tagi na tapa atu ai le ofisa”.