“E ese lava la‘u fesoasoani ese feagaiga a le Malo ma Ausetalia,”… Sanele Katie Moananu
O le faamatalaga lea a Katie (Sanele) Moananu ina ua tapa sona finagalo i le toe laga mai e le Ofisa o le Palemia o lea e lei mae‘a feutagaiga ma Ausetalia i avanoa faigaluega faavaitaimi. Faaalia e Katie, o lana ia Ofisa Malaga, ua leva lava ona fesootai i le tausaga na tea nei ma se tamaitai Samoa i Melepone, o ia lea o loo fesootai ma faatoaga i lea itu o Ausetalia.
“E sa‘o le ofisa o le Palemia ma a latou faasalalauga, ae o lo‘u ofisa o loo faagaioi lava avanoa ona o lea ua iai le faatoaga ua ou fesootai ai mo le avatu i ai o tagata o loo agai mai ia te au.”
O le vaiaso na tea nei na faalauiloa ai e le Ofisa o le Palemia, i le vaega o loo nafa ma le faatautaiga o avanoa faigaluega faavaitaimi i Niu Sila ma Ausetalia o loo faagasolo lava feutagaiga i le va o le malo o Samoa ma Ausetalia i le faamautu ai o faatoaga mo avanoa faigaluega i setete o Ausetalia.
Seiloga la ua mae‘a lea tulaga ona faato‘ā amata lea ona faatautaia talosaga e tuu atu, ae o le taimi lenei na o le Ofisa lava o le Palemia i le vaega ua ta‘ua e faatautaia ia tulaga.
O le amataga o le tausaga na faalauiloa ai e Sanele Katie Moananu, o lona ofisa malaga lea ua aumai le faatagaga e le alii Palemia ina ia faatautaia ai e lona ofisa talosaga mo avanoa faigaluega faavaitaimi ia i Ausetalia.
O le faaiuga o le vaiaso lea ua agai ai le vaega lona tolu o tagata ua mafai ona maua avanoa e amata ai ona galulue i Ausetalia.
O le faamatalaga a Katie, o lea ua ia iloa e lei amata avanoa faavaitaimi ia ua faalauiloa i le va o le Malo o Samoa ma Ausetalia ona ua mae‘a logo mai lo latou ofisa o lea e faatali le ofisa malaga a Ausetalia ma le latou ofisa o Galuega (Labour) i le faamae‘a ai o le sailiga o faatoaga mo galuega i lalo lea o le polokalame o loo faatautaia e le Malo.
“O la‘u galuega lea e fai o le ao o talosaga ona ave lea o le tele o talosaga nei i le Ofisa o le Palemia e faatali ai le taimi e tatala mai ai avanoa ae ua iai a‘u tagata ua agai i Ausetalia ma ua faatautaia ai e Su‘e Meredith, le sponsor mai i Ausetalia o a latou pepa mo galuega faavaitaimi ua ofo ane e le Kamupani lea ua maua ai galuega o le tauina o le moli”.
O le taimi lenei na ta‘ua e Katie e to‘a 40 tagata ua taofia suafa i lalo o le polokalame o galuega faavaitaimi nei ua faalauiloa e le Malo e pei ona sainia ai le feagaiga ma le Malo o Ausetalia ae o loo faagasolo lava pea galuega a le ofisa malaga o le K & M Travels latou.
“O lea ou te iloa o loo agai uma lava talosaga o avanoa nei e faatali mo le tatala mai o talosaga, ae e ese lava a‘u taumafaiga ae ua mae‘a ona ma feiloai ma le Palemia ma faamatala uma lava i ai le faatinoga o le auaunaga a le matou ofisa”.
O le popolega na faaalia i le pule o le ofisa malaga, ne‘i afaina le taumafaiga lea ua iai le maliega ma ua faapea mai foi le Ofisa o Ausetalia o lea lava ua tuu mai i le Malo o Samoa e faatino le latou galuega ma e pule lava la le ofisa o le Palemia poo ai e faatinoa ia galuega.
Faaalia e Katie o lea ua manino i le faasalalauga o lenei vaiaso ae ua faapea foi ona ia logo tagata ua oo atu ia te ia e faatatau i le polokalame lea ua iai i le taimi lenei, aemaise o lana ia auaunaga, lea e ese mai i le taumafaiga tele a le Malo ua faatali le faatinoga i se taimi o lenei tausaga.
