E momoo le toatele ia faamagaloina o latou sese e tagata o sese i ai, ae naunau nisi ia mafai ona faamagalo i ni tiga sa mafatia ai. O laasaga faigata ia i le soifuaga o tagata. Tatou te fia mautinoa ua faamagaloina i tatou e isi, ma fia maua le loto faamaoni e faamagalo ai nisi sa faamanu‘aliaina tatou. E oo lava i soo o Iesu, sa feagai ma lea Luitau, o le taumafai e faamagalo atu. Sa ola i se siosiomaga e amio paaa tagata, e lē taupulea. Ona fesili lea o Peteru ia Iesu, pe faafia ona faamagalo i se uso. Alu atu ma le fuainumera, pe faafitu.
I aoaoga faa-Iutaia, e faatolu ona e faamagalo lou uso, ae sii e Peteru ina ia sili atu, e faafitu. Ae faateia i le tali, e lē faatolu, e lē faafitu, ae faafitugafulu ni fitu. O se laasaga maualuga e taoto ai le finagalo o le Atua. E lē faitau masei, ae ia faasilisili le loto faamagalo. E faigata, ae na o le alofa tunoa o le Atua e mafai ai ona ausia lea luitau. Masalo sa uu gutu o le ausoo ona o le matatia ua faailo e Iesu, fitugafulu ni fitu. Ona faamatala lea e Iesu le faataoto, e faapupula ai le ute o lona finagalo.
O le tupu ma ana auauna e toalua. Sa nono tupe le Auauna Muamua. Ua oo i le taimi e totogi ai lana aitalafu, ae lei mafai ona totogi, ona alu lea ifo ma faatoga, e ave ia, le toalua ma lana fanau e faatau e totogi ai le aitalafu, ma tuu atu se taimi se‘i saili ai.
Sa suia atoa lea vaaiga faanoanoa ina ua faapea le tupu, faasaoloto uma latou ma faamagalo le aitalafu. Manatunatu i lea vaaiga, saoloto le auauna, saoloto le toalua, saoloto le fanau, magalo e pei lava e lei nofo aitalafu muamua. Ua mamā.
Ua ulufafo lana susuga lea sa faamagalo e le tupu lana aitalafu e 10,000 taleni, ae fetaui ma le Auauna lona Lua e aitalafu ia te ia, i le 100 tenari. Sa tauanau e totogi lana aitalafu.
Sa faapa‘ū le Auauna lea ma faatoga e tuu atu se taimi e totogi ai lana aitalafu. Sa lē mafai, ae ua faatonu ia ave e falepuipui. E fai nei gaoioiga lē alofa, a o maitau e isi, ma logo i le tupu le faafitauli ua tulai mai.
Ona toe aami faalua ane lea o le Auauna Muamua, ia alu ane i luma o le tupu. Ua liua le alofa o le tupu i le tiga, ua poloai e lafo i le falepuipui. Sa alofa i ai le tupu ma faamagalo lana sala e tusa ma le 12 miliona tala pe a faaliliu i tupe i le taimi nei. Sa alofa i ai le tupu i le tagitagi ane.
Ae ua ia le mafai na faamagalo le sala a le uso a auauna, na o le 100 tenari, tusa ma le $1.80 pe a faatusatusa i tupe o le taimi nei. E matautia le telē o lana aitalafu, a ua fulitua ma inainā i le aitalafu a le uso, na o le $1.80.
Ua uma le faataoto i auauna e toalua, ae ua taoto nei i lumāmea le Luitau a Iesu mo Peteru ma le ausoo, aemaise i tatou lana fetalaiga (f.35), “E faapea foi na faia ia te outou e lo‘u Tamā i le lagi, pe afai tou te lē taitasi ma faamagalo ma o outou loto atoa i o outou uso pe a latou agaleaga mai.” O lea ua saunoa Iesu i le va o tatou ma isi tagata, ma le taui a le Atua. Ou te tautino atu, e ova ma le 12 miliona tala le telē o la‘u sala, e lē mafai ona totogi. E lē mafai e lo‘u aiga, e lē mafai e la‘u ekalesia, e oo lava ia Ausetalia latou te lē mafai ona tuuina mai se tupe faapea e totogi ai. E lē lava foi lo‘u oti faasefulu e magalo ai a‘u agasala i luma o le Atua. O lo‘u iuga, o seoli.
A o lona alofa mutimutivale ma lana amiotonu, ua ia faaee ai lau sala i luga o lona Alo pele. Ua ta‘u agasala o ia, ina ia tauamiotonuina a‘u. Ua malaia o ia, ina ia manuia a‘u. Ua inosia ma tuulafoaiina o ia, ina ia alofagia a‘u. Ua ia ave la‘u sala, ina ia lē tausalaina a‘u. Ua suia mai i le atalii o le faafanoga, ae ua fai ma atalii o le Tupu o tupu ma le Alii o alii. Afai ou te manatua pea lea mea ua fai e le Atua mo a‘u, ona faigofie lea ou faamagalo atu i nisi, i ni aleu ma ni o latou faaletonu i le va nonofo faaletagata, auā ua ou mautinoa, e telē naua la‘u sala ua faamagaloina e le Atua.
O le tatalo a le Alii ua masani ai tatou, e ogatotonu ai se tautinoga faapea, ia e faamagalo mai ia te i matou iā matou agasala, e pei o i matou foi ona matou faamagaloina atu i ē ua agaleaga mai ia te i matou. O le augani i le Atua, ia faamagalo tatou mai a tatou agasala, auā o lea foi tatou te faamagaloina isi tagata. O le fesili, e faamaoni ea tatou i lea tatalo ma le tautinoga?
O le mea moni, e leai se alofa e aunoa ma se faamagaloga, e leai foi se faamagaloga e aunoa ma se alofa. Afai tatou te manatu ua lē alofaina o tatou ma le mamafatu o a tatou agasala ua faamagaloina e le Atua, e tatau foi ona faigofie ona tatou faamagalo atu.
O se mea matagofie naua lea pe afai tatou te fai, auā e te selesele mai le olioli ma le filemu i taimi uma e te faatinoina ai.
E lē mafai e le tagata vaivai ona faamagaloina isi tagata, na o le tagata e toa lona loto na te mafaia ona faataunuuina lea aveai a le Atua. Faapefea oe? E te mafaia lea Luitau? Soifua.
