E ui lava ina agai le toatele o Samoa i lo latou atunuu pele aua le faamanatuina o le Iupeli Auro, poo le 50 tausaga talu ona avea Samoa ma malo ua tutoatasi lava ia i le faatinoina o ana pulega, ae sa lei tuua ai foi le agaga fia soosoo tau‘au atu o le mamalu o Samoa ua lē mafai ona paau atu i fanua, faapea foi isi atunuu o loo aumau ai tamafanau a Samoa, i le finagalo lava e tasi, ia faatino pea se sauniga faapitoa e lagonaina ai faatasi le tāua o lenei aso ua faapitoa i agaga o soo se Samoa.
O le ala lea na a‘e ai se tofa i nisi o sui o le atunuu e lei agai atu i le atunuu, e faatino se sauniga lotu, e faamanatu ai le Tutoatasi o Samoa, e pei ona iai le sauniga tuufaatasi sa faataunuu i le afiafi o le Aso Sa na tea nei, aso 3 o Iuni 2012, i le malumalu o le ekalesia St Stephen’s Church i Ponsonby, 65 Jervois Road.
O se sauniga faafetai sa auai atu i ai taitai lotu uma o nisi o ekalesia Samoa ma nisi o tino matutua i le komiuniti.
Sa auai foi le afioga i le alii faipule, Susuga Su‘a William Sio, o nisi foi o sui o le palemene a Niu Sila, le afioga i le Komesina o Fefaatauaiga a Samoa i Niu Sila, le afioga Fonoti Lafitai Iupati Fuatai ma le loaloa o Samoa i Aukilani.
O le susuga i le faafeagaiga a le Ekalesia EFKIS mai Newton na taitaia le sauniga, le susuga a Lolagi Mika, ma e toatele foi nisi o tamafanau a le atunuu ua iloga i tomai eseese i Niu Sila nei, sa faatino ni a latou vaega i lea afiafi auā lava le faamatagofieina atili o lenei sauniga lotu faafetai.
O le po foi lea sa auai atu ai le faatonu o le Miss Samoa Niu Sila, le tamaitai o Teeva Matafai Leniu, le Tausala Samoa NZ o loo tauaveina le pale i lenei tausaga, le tamaitai o Metotisi Komiti Faalavaau, faapea ma tamaitai lalelei e toalima mai ia i latou o le a sauni e tauva mo le pale o le Miss Samoa Niu Sila o lenei tausaga.
O le uluai sauniga taualoa lea a le komiuniti ua auai atu i ai nei tamaitai ma amata faamasani ai i le auai atu e lagolagoina meafai mo le atunuu i totonu o Niu Sila nei.
Sa maua ai foi i lea sauniga se avanoa o le alii talavou o se tasi o talavou ua iloga foi lona tulai mai i ana taleni ma tomai eseese, ua avea ai foi o se amepasa tāua mo alo ma fanau talavou a Samoa i Niu Sila, le susuga Simon Matafai, ma sa fai ai foi sana tautalaga faaleagaga sa mafuli atu i le faalaeiauina ai o talavou ina ia maua le agaga Samoa moni o le saili malo ma finafinau mo mea lelei.
E ui ina tele sauniga eseese faapea o loo faatino solo i vaega eseese o le atunuu nei, faapea foi isi atunuu o loo alala ma papaao ai Samoa, ae tasi le auga autū, o le fia faafetaia o le Atua, ona o lenei ua aulia mai le 50 tausaga, ae o loo moni pea ma maioio atu i le vaavaai mai a le lalolagi atoa, le uiga moni o le Tutoatasi o Samoa, auā o loo faagasolosolo lelei pea ana pulega e aunoa ma se peau e laga.
