O le ulutala lea ma le mataupu autu o le finauina o manatu, o se polokalame faapitoa sa faatautaia e le Iunivesite a le AUT, mo le faatāuaina o le vaiaso o le Gagana Samoa, lea na faataunuiina i le vaiaso na tea nei.
Na talimalo ai le afioga Tagaloatele Professor Peggy Fairbairn Dunlop, o ia foi o le Polofesa o aoaoga a le Pasefika i le Iunivesite a le AUT i Manukau.
Na amataina le polokalame i se sauniga lotu na taitaiina e le susuga i le Faafeagaiga Rev Featunai Liuaana, sosoo ai ma se saunoaga faapitoa a le afioga i le Faipule o Mangere, MP Su‘a W Sio.
Na taitaiina e le afioga Sala Faasaulala Tagoilelagi Leota le itu a le Iunivesite, o i latou na finau e lagolagoina le manatu autū. Ae o le Afioga le faletua ia Tuiataga Faafua Tautolo o le taitai o le Itu Tetee, o le ‘au na filifilia mo le finauina o manatu tetee e faapea, o le Gagana Samoa e aoaoina i le faleaoga ma le malo, aoaoina mai le aufaasalalau aemaise mai aoga faifeau.
E matagofie manatu ‘anoa sa faaalia e au e lua i le finauga o le mataupu, ae peitai i le faaiuga a le au faamasino na manumalo ai le au a le faletua o Tuiataga ma tauaao atu ai loa i ai le ipu o le manumalo.
O le laulau a le au faamasino na taitai ai le tofa ia Fata Seuseu Pito Faalogo, faatasi ai ma le afioga a le Komesina o Fefaatauaiga, Fonoti Lafitai Iupati Fuatai, ma le sui o le Fagasa le faletua ia Faimai Pisu Tuimauga.
O le Iunivesite a le AUT i Manukau, o loo taulamua mo le aoaoina o mataupu eseese faapitoa mo tagata Pasefika. O loo taulamua ai foi nisi o alo ma fanau Samoa. O nisi o mataupu oloo aoaoina i le AUT e pei o le:
1. BA Pasifika ECE course. O le uluai mataupu lenei ua faalauiloa i Niu Sila, ma le Pasefika.
2. Mataupu Tikeri – Sports and Recreation, e aoaoina i le Mellenium Stadium a le AUT, ma e toatele i latou ua lauiloa i taaloga e pei o Valerie Vili o loo toleni ai.
3. O le Post Graduate Diploma in Arts with a Pacific Studies Focus.
Aemaise le tele o courses faapitoa ma aoaoga tāua e pei o mataupu tau le soifua maloloina ma mataupu mo le aoaoina o faiaoga, Design and Technology.
