O la‘u lagolago i lo‘u fiafia i le faamoemoe o leoleo tuai, ua ou le solomuli ai”…Sulusulumaivasa Aiva
O ni mitiafu fou anagata e pei ona faamatalaina ai e le toatele o sui sa malaga atu i Niu Sila, o sui mai Sini ma Melepone i Ausetalia ma se sui mai Amerika Samoa. Sa faamoemoe le asosi faatina i Samoa e fesoasoani i le faatupeina o mitiafu peitai na ofo le afioga Sulusulumaivasa e fai uma e lana kamupani e avea ma ona sao e lagolago atu ai i le Peresitene aoao ma le komiti faafoe i tapenaga o le faamoemoe.
O faamaumauga o le foai e pei ona taulimaina e le asosi faatina i Samoa o loo faaalia ai e $7,000 tupe Ausetalia na faaalia e Le Manamea Samoa ma le afioga Sulusulumaiavasa ae le o faaopoopoina i ai le $500 tupe Ausetalia na lafo ai i Samoa pusa lapopoa na teu ai laei o le foai. Pe a faaliliu lea foai atoa i tupe Samoa e silia i le sefululima afe tala.
“O se foai maoae lenei ua aumai e se sui e toatasi e lagolago ai le matou tapenaga ma ou te faafetai ai i le afioga Sulusulumaiavasa ma lana auaunaga faanusipepa ma le leitio ona e le faigofie sailiga o tupe i nei aso”, na saunoa ai le Peresitene.
O tapenaga a le asosi faatina na saili tupe ai e ala i se lulu poo se raffle, o se siva ma a latou tusi aisi, peitai ina ua palasi le foai lea o se faamama avega mo le asosi faatina e pei ona faaalia lava e le Peresitene.
O le faafetai ma le faamalo foi a le peresitene ia i latou sa lagolagoina a latou suegatupe na maua ai se seleni e tusa ma le $10,000 ma ona tupu sa faaopoopo i nai seleni sa totoe i le latou teugatupe i se tasi o faletupe i Apia.
O le seleni atoa lea na fesoasoani i tapena ma o loo galulue nei le Komiti faafoe ma le teutupe mo le tuufaatasia o seleni uma na maua ma seleni na faaalu.
O le agalelei o nisi o pisinisi ma kamupani e 15 na tali atu i tusi aisi ua mafai ona faatino ai le faamoenoe o le reunion muamua faia e le asosi talu ona aloaia lona faatuina i le tausaga e 1992.
Ua taliu nei sui sa malaga mamao mai ma le faamoemoe e faatu ni a latou mafutaga e faamaopoopo ai i latou sa avea ma Malu o le Malo o loo aumau i atunuu e pei o Niu Sila ma Ausetalia faapea isi atunuu. Faalia e se sui sinia o le asosi, e le aumaua mafutaga faapea ua toe feiloai ma fevaaia‘i ai i latou o leoleo tuai.
O le a silasila nei le asosi a Samoa e tuutuu laau i Niu Sila ma Ausetalia mo le faamautuina o fuafuaga.
