O le tusi lenei na tusia e le tamaitai fomai o Irena Madjar ma le tamaitai polofesa o Elizabeth McKinley o le poloketi a le Starpath i le Iunivesete a Aukilani ae sa faasamoaina e Faimai Pisu Tuimauga. O le gagana muamua foi lenei ua faaliliuina i ai mai le gagana faaperetania.
E pei ona silafia, o le NCEA, o le tusipasi lea e sueina e alo ma fanau i aoga maualuluga, e amata i le Laasaga 1 i le Tausaga 11 poo le Form 5, Laasaga 2 i le Tausaga 12 poo le Form 6, ma le Laasaga 3 i le Tausaga 13, poo le Form 7.
I faamaumauga a le ofisa o aoga, oloo faaalia ai le maualalo o le numera o tamaiti Pasefika ma tamaiti Maori e faamanuiaina i ia suega, o le mafuaaga foi lea o lenei suesuega na faafoeina e le Iunivesete a Aukilani, o le fia mataituina lea o le mafuaaga o le toatele o tamaiti Pasefika ma Maori e le manuia taumafai i nei suega.
Sa matua faatumulia le hall a le aoga maualuga a Porirua i Ueligitone, i sui mai matagaluega taitasi, matua, faiaoga ma tamaiti aoga, faapea foi ma puleaoga, i le faapaiaina o lenei tusi i le afiafi o le Aso Gafua 28 Me 2012.
Sa faatasi ai le afioga i le minisita o Aoga – Hekia Parata, o ia foi lea o le minisita o le Matagaluega mo Tagata Pasefika i Niu Sila. I lana saunoaga autu o le afiafi na ia ta‘ua ai, “O lenei tusi o se measina tāua, ma ua matua talafeagai ma onomea ona tatou potopoto mai tatou te faatauaina lona faapaiaina.”
Na saunoa le tamaitai polofesa o Elizabeth McKinley, ua faatumulia i le fiafia ona ua faasamoaina lenei tusi ona o le gagana Samoa, o le gagana lona tolu lea e pito i le gagana faaperetania ma le gagana Maori le faaaogaina i Aukilani i Saute e tusa foi ma ni suesuega sa faafoeina e le Iunivesete a Aukilani.
Sa ia saunoa, afai e fia talanoa i le tele o matua, e faaaogaina ni tagata faamatala upu, ae ua fiafia tele o le a faitau lava matua Samoa ma malamalama lelei ai i le NCEA i la latou gagana, ina ia tele so latou sao i le aoaoina o o latou alo ina ia maua ni lumanai manuia.
Sa auai foi le tamaitai pule o le NZCER [New Zealand Council for Educational Research], o Robyn Baker, o le matagaluega foi lea sa latou lolomiina lenei tusi. Sa ia saunoa foi I lea afiafi, oloo taumafai nei e sailiili nisi o kamupani e fesoasoani i le faatupeina o le toe lolomiina o le tusi ina mafai ona oo atu i matua e aunoa ma se totogi.
O se finagalo foi lea o le tamaitai polofesa o Elizabeth McKinley na faaleoina ma momoli atu i le tamaitai minisita. O le taimi nei oloo maua le tusi I le $10. I le taimi nei e mafai ona fesootai atu i le NZCER I le upega tafailagi: www.nzcer.org.nz mo ni kopi o le tusi.
Sa auai foi le taiulu o le Matagaluega o Aia tatau a Tagata Joris De Bres i lea afiafi, ma sa faaalia foi lona lagona fiafia ona o lenei galuega tele i le saunia lea o lenei alagaoa taua mo tamaiti i aoga maualuluga ma o latou matua.
Oloo fuafuaina nei se aso e faapaiaina ai le tusi “O le MALAMALAMA I LE NCEA” i Aukilani.
Talosia ia faaaogaina lenei tusi ina ia malamalama lelei ai i le tāua o le galulue faatasi o aoga, matua ma fanau, ina ia femalamalamaai i vaega taua e galulue faatasi ai, mo se taunuuga manuia o fanau mo a taeao.
