Sauni leoleo osofai ma tapue au faatau aisa ma maruana

Ua ioe le Komesina o le Matagaluega o Leoleo ma Falepuipui, susuga Papalii Lorenese Neru, e ui ina malupuipuia uafu ma le malae vaalele faavaomalo o Samoa mai le faaulufaleina i Samoa o soo se ituaiga o fualaau faasaina ma laau malosi e le faatagaina i le atunuu, ae le o mafai ona oo le silafia o le matagaluega o leoleo ma le ofisa o le Tiute i isi nofoaga o le atunuu e ono mafai ona taunuu ma faaulufale ai i le atunuu ia ituaiga o oloa. O le tatalo lea a le Komesina ma le matagaluega i le pulega mamalu a Alii ma Faipule o nuu ma afioaga ma le lautele o le atunuu, ina ia lipoti atu soo se vaaiga e ono masalomia o loo faatino ai ni faiga solitulafono faapea.
O le talosaga a le komesina na afua i se feiloaiga na valaauina ma tusitala ona o le salalau ai o se lipoti a le Televise a Niu Sila (TVNZ) e faatatau i ni faiga solitulafono o loo faatino i Samoa ua aofia ai le faatau faasolitulafono o laau faasaina ma le pauta matautia o le aisa e faapea e aumai mai Niu Sila, atoa ai ma le faaulufale faanana i le atunuu o laau malosi mai Amerika, lea e faapea o loo toe faatau atu e nisi o loo taunuu i ai ia aupega mo i latou o loo manaomia ia aupega i se tau e $350 tala ma le $1,500 i le laau malosi e fuafua i lona malosi. Na taua ai foi e faapea o loo iai se kegi i Samoa e taua o le Makoi o loo latou faatauina atu maruana ma isi ituaiga o pauta ma fualaau faasaina e pei o le aisa poo le methamphetamine poo le “P” o loo faaigoa ai i Niu Sila.
O loo iai le talitonuga o le alii Komesina e leai se eseesega o mataupu ua laga i lea lipoti ma nisi o mataupu o loo faatino i ai galuega a leoleo, aemaise o loo fesootai ai ma le vaega o le Tiute ma leoleo a le Malo o Niu Sila. O le finagalo o le Komesina na faaalia i tusitala o loo malu ma saogalemu le vaaiga o uafu ma malae vaalele, ma o loo faatalanoaina le lipoti ua salalau i le va o leoleo i Samoa ma leoleo a le malo o Niu Sila. E lei matua manino mai se finagalo o Papalii Lorenese Neru, poo a tonu vaega o loo fesootai ai matagaluega o leoleo e lua, ae na ia taua o loo faaaogaina taifau sosogi e faatino ai le sueina o fualaau faasaina, aemaise ua taunuu se alii mai Ausetalia e poto i le aoaoina o taifau sosogi e faatino se gaioiga e mafai ai e taifau ona sue aupega poo laau malosi e aumai faanana i le atunuu.
E toatasi se taulealea ua taofia e leoleo mo suesuega i le faia o gaioiga e faatau ai fualaau ma laau faasaina e pei o le maruana, ae o loo faia pea suesuega i le fia maua o isi taulelea na faaali mai o latou ata i le televise, ma taua ai o i latou ia o loo faia lea gaioiga, ma o loo faaaupegaina i agaese (sapelu) maa, ma to‘i e leoleo ai le saogalemu o le latou gaioiga. Sa taua e le Komesina e iai lo latou talitonuga o se taumafaiga lea a nei tagata e faafetoai le malosi o leoleo ua osofaia ai pea nisi o nofoaga faitele e pei o le maketi i Fugalei lea na maua ai ni tagata se toaono talu ai nei i se osofaiga. O ia tagata na maua o latou faatau faasolitulafono sikaleti maruana ile maketi i Fugalei.
E ui e lei maua tonu tagata na talanoa i le tamaitai tusitala o le televise a Niu Sila, peitai na faaalia e le Komesina o loo lelei le faatinoga o galuega a leoleo i le lē foi lea o leoleo i le faaauauina pea o a latou osofaiga. Ua fautuaina foi le atunuu e le komesina ia aua nei faapopoleina i le lipoti ua aumai aua o loo malu ma malosi le puipuiga a leoleo mo le vaaia o le saogalemu o le atunuu atoa. O vaa fagota lapopoa ma vaafagota laiti e pei o ‘Alia o loo tuutaula ile uafu o vaafagota i le maketi o i‘a i Savalalo o le tasi lea vaega ua silasila nei i ai le matagaluega o leoleo. Faaalia e le Komesina o le a le toe faatafa leoleo i le sueina o vaa fagota i taimi uma. E lua ni osofaiga talu ai nei na maua ai nisi o le au fagogota o latou umia laau faasaina poo sikaleti maruana, ma ua tele foi lipoti ma faamatalaga ua taua ai le aafia o nisi o tagata fagogota i ni faiga tau fefaatauaiga i laau faasaina ma nisi vaa fagota pe a oo ina alu o latou faiva. O le tasi lea mafuaaga ua iai le talitonuga o le a le toe foi ai le suesueina o soo se vaafagota.