Ua lolofi atu nei le toatele o le atunuu o iai saofaga i le NPF e faia a latou nonogatupe laiti ina ua maua le fitu pasene o le tului faaopoopo i luga o saofaga, o se faamanuiaga a le NPF e faasafua i tausaga taitasi i le maea ona sueina o tusi o faamatalaga tau tupe a lea faalapotopotoga tele a le Malo. O le tausaga nei ua vave maua lea faamanuiaga ona o le vaai alofa o le komiti faafoe ma le pulega o le NPF i le au faisaofaga o loo fia maua ni seleni, aemaise i lenei taimi ua aafia tamaoaiga o atunuu o le lalolagi i tulaga faigata.
E $21 miliona se vaegatupe ua faasafua e le faalapotopotoga mo le au faisaofaga e ala i le tului e fitu pasene lea e fitusefulu afe, ivaselau, fasefulu tolu (70,943) tagata o le a latou mauaina. Mai lea aofaiga e na o le 20 ma ona tupu afe le au faisaofaga o loo galulue pea ma alu a latou seleni i le NPF ae o le isi 50 afe ma ona tupu ua le o toe galulue ae o loo iai pea a latou saofaga i le faaputugatupe. O nisi ua malaga i atunuu i fafo ae o loo malu pea a latou saofaga i le NPF o loo teu faafaigaluega ai, ma o tagata ia o loo sili ona manuia aua o loo faaopoopo pea a latou seleni e le gata i faamanuiaga faapea, ae o tului i tausaga taitasi mai le faafaigaluegaina o a latou seleni o saofaga i le NPF.
E le o se faiga fou lenei i le NPF e pei ona silafia e le toatele, o le tele lava o tausaga e masani ona faamatuu mai ai ni pasene o lau saofaga o iai e mafai ona e toe nono mai ai pe afai e manaomia mo fuafuaga a le tagata lava ia. O nei pasene ua avea ma faamama avega i le toatele aemaise lava i taimi tonu o aso faamanatuina e pei o le aso Sa paepae o le fanau poo le Lotu Tamaiti atoa ai ma le taimi lenei o le Eseta.
