Ua talepe le faatuatuaga o le kamupani na ave i le tamaitai o Eleni Valaauina, 28 tausaga o Tufuiopa na te faamaopoopo ma vaaia ai tupe e maua i galuega a le kamupani o le T & N Toleafoa, le mafuaaga ua faia ai le faasalaga faafalepuipui ia te ia e ui o loo mamafa i lona maitaga. Peitai na faaalia e le faamasino le afioga Vui Clarence Nelson, ua iai vaega ua saunia i le falepuipui mo tamaitai maitaga e nofosala i le toese, faapei o isi tamaitai maitaga ua maea ona faia iai faasalaga faafalepuipui. O le masina o Iuni o le tausaga ua mavae 2008 na tupu ai soligatulafono ua molia ai le tamaitai e pei ona faaalia i tolaulauga a leoleo o aso ma vaega tupe na toesea:
1. Iuni 10, 2008: $2,734 mai tupe sa faamoemoe e teu i le faletupe poo le banking
2. Iuni 12, 2008: $130.00 mai tupe na ia taulimaina mai se tasi sa faatau ni ana pau taavale mai le kamupani.
3. Iuni 16, 2008: $31.30 o tupe siliva o le pamu penisini a le kamupani.
4. Iuni 19, 2008: $31.00 i lona suia lea o le aofaiga o se tupe na utu ai se taavale i le pamu penisini.
5. Iuni 20, 2008: $300.00 mai tupe o le pamu penisini.
6. Iuni 20, 2008: $300.00 mai tupe o taavale rent a le kamupani.
7. Iuni 20, 2008: $250.00 o taavale rent lava a le kamupani.
8. Iuni 20, 2008: $250.00 o tupe o pasi lau pasese a le kamupani.
9. Iuni 20, 2008: $350.00 o tupe a le kamupani na maua i isi ana auaunaga ma galuega.
Aofai atoa o le seleni na ia gaoia e $4,376.70.
Ua avea ma lelei o le tamaitai le faatoa molia lea i se solitulafono peitai na saunoa le alii faamasino o Vui i le ogaoga tele o lenei ituaiga o solitulafono ua molimauina le faatuputupulaia pea. E 12 masina ua nofosala ai Eleni Valaauina i le falepuipui i Tafaigata.
