O le siamupini o Samoa i fusuaga le alii o Vaitele Soi ua faamaonia mai nei e lana pulega o le Event Polynesia le aloaia o le sainia o lana lu‘i i le alii Ausetalia o Anthony McCracken i le la fusuaga e faia i Niu Sila i le aso 28 o Mati i le tausaga nei.
O le alii Ausetalia o le siamupini lea o lenei faaitulagi ae lona 13 i le faagasoloina o tama fusu a le lalolagi. E tolu fusi o loo ia umia e lenei alii, o le WBA-Pan Africa Cruiserweight, WBO – Asia Cruiserweight, ma le OPBF-Cruiserweight, o le alii Anthony McCracken na ia faatoilaloina foi le alii fusu o David Aloua ia Novema i le tausaga ua mavae, a o lea ua fia feiloai i lea alo o le atunuu le susuga ia Vaitele Soi. O le lagolago ma le taumafai malosi o le Event Polynesia ua mafua ai le solosolo lelei o taaloga a lenei alo o Samoa, auā e lē o iai se fesoasoani mai le malo e lagolago ai Vaitele i ana fusuaga.
O le tausaga 2006 na amata faafailele mai ai e le Event Polynesia Vaitele i ana fusuaga seia oo lava ina faamanuiaina i le tele o ana taaloga, aemaise o lana fusuaga o loo loma nei. Ua faaalia e le pulega o le Event Polynesia le maualuga o se tulaga o le a oo i ai lenei alo o le atunuu pe a faamanuiaina lana taumafai.
Afai ae tau lau o lona faamoemoe o lona uiga o le a see atu Vaitele i le numera 15 o faagasologa o tama fusu a le lalolagi faatasi ai ma ana fusi e tolu, ona toe sauni lea i sana fusuaga ia Iuni, a manuia o lea ausia loa le lona 10 o faagasologa o tama fusu a le lalolagi, a faamanuiaina foi lea taumafai o le a toe fusu i le faaiuga o le tausaga ia Tesema auā lava se sailia o sona tulaga maualuga i le lalolagi i taaloga o le faipelega.
E ui i lona lē ausia o le manumalo o le suega siamupini o le Super 8 i le tausaga ua mavae ma le alii o Brad Pitt, ae sa maualuga i le silasila a le atunuu na maimoaina ia taaloga faatasi ai ma le pulega le tele o le suiga ua oo i ai le taumafai o lenei alo o le atunuu.
O se alii e malosi toe telē lona iloa i le faatinoina o le taaloga. O loo koleni nei Soi i Aukilani i lalo o le taitaiga a le alii koleni o Lolo Heimuli, ma ua tuu atu ai nei foi ma le tauau o le Sky TV e lagolago lona taumafai.
Ma o lea ua sauni atu nei Vaitele Soi e fusu mo Samoa ma Niu Sila i le lu‘iina o fusi e tolu o loo umia e le alii o Anthony McCracken, aemaise o lona taumafai e faatoilalo lea alii na faia‘ina ai lana uo ia David Aloua.
