Ua toe tapena ma silasila mamao le faiaoga o le Under 20 le afioga ia Lemalu Semo Sititi i le toe sailia o ni tamaiti e tauavea le fu‘a a le atunuu e ala i lana Manu Samoa laititi poo le Under 20. E latalata i le 200 tamaiti sa resitalaina o latou suafa e faia ai le filifiliga, ae peitai sa lē mafai ona auai uma lea fuainumera ona o nisi o loo faamanu‘alia a o nisi o loo fuafua e auai atu i Ueligitone pe a faataunuuina ai le isi faamoemoe.

O le Aso Toonai ua mavae na tumutumu ai mātua ma fanau Samoa i le malae o le kalapu lakapi a Papatoetoe e sailia ai ni tamaiti e ono faia ai le filifiliga mulimuli o le au i le aso 8 o Aperila.

O tamaiti mai Aukilani, Bay of Plenty, Palmerston North, New Plymouth faatasi ai ma Dunedin sa auai uma i lea tausinioga. O le autu o lea aso o le faailoaina o le iloa o fanau i le taaloga o le lakapi ma taumafai e piki mai ai loa tamaiti auā lava se sailia o le au a le atunuu. O le susuga ia Namulauulu Alama Ieremia, Toa Samania ma nisi o tama tuai o le Manu Samoa sa galulue faatasi ma le susuga i le faiaoga ia Lemalu Semo Sititi i lea aso.

Na amata i le saili o le mānava, ona sosoo ai lea ma le vaevaeina i au e lua e sue ai le maualuga ua oo i ai fanau i le faatinoina o lea taaloga.

Ae na ta‘ua e le faiaoga ia Lemalu Semo Sititi ua tele le agai i luma o le tomai o fanau ua iai aemaise ua toatele sui ua mafai ona auai mai, ma o tamaiti o le a pikiina i lea taamilosaga o le a faia ai le filifiliga mulimuli o le au i le aso 8 o Aperila.

Na o Aukilani ma Ueligitone o loo faia ai lenei polokame mo Niu Sila nei, ae o loo fuafua le malaga a le pulega ma le faiaoga mo Ausetalia e faataunuuina ai se isi faamoemoe faapenei ona e toatele mātua ma fanau o loo mananao mai e fia auai o latou alo i le sailiga o le au a le atunuu.

Ua mae‘a le taamilosaga a Samoa, lea sa faia ia Novema i le tausaga ua mavae, ma ua filifilia mai ai tamaiti e 30 e sauni atu i le sueina o le au ia Aperila.

Silasila le pulega i le faatinoina o le taaloga mo le pikiina oni tamaiti

Lemalu Semo Sititi ma tama tuai o le Manu Samoa na faatinoina taaloga i le kalapu lakapi i Papatoetoe