O le toe fausia o le Uafu i Matautu, faapea le toe faateleina o le Malaevaalele e faafoliga i Malaevaalele faavaomalo o atunuu i fafo, o nisi ia o galuega tetele ua faataoto mai e le afioga i le Palemia, o le a faatino uma i le tausaga lenei 2015. Peitai e iai nisi vaega sa fesiligia ai e le autusitala lana afioga i le Palemia, ona o loo faalogoina pea o le ofo a le Malo Iapani, e mafuli mo le faatinoina o ia galuega tetele. Na faaalia ai e le Afioga i le Palemia, Susuga Tuilaepa Lupesoliai Sailele Malielegaoi, o le tele o fesoasoani a Iapani, o foai.
E moomia a tatou atinae tetele e faatino i foai (grants) e pei ona faatupe mai ai a tatou vaa tetele o iai nei mo femalagaa‘iga, fausia o uafu o taligalu tetele i Apia ma Faleaoga i nuu i tua, e fia molimoli ai foi le agaga faafetai i lea foi malo agalelei. Na faaalia foi e le Afioga i le Palemia, ua uma ona tali aloaia mai le malo Iapani o le a latou toe faafouina se vaega o le Uafu Tuai i Matautu ua satia, ma o loo faamae‘a tapenaga mo lea faamoemoe.
E amata foi i le tausaga nei ona ave le faamuamua a le Malo i ana atinae tetele, lea e amata i le toe faaleleia o le Uafu i Matautu, a mae‘a ona faatoa avanoa foi lea o le Malo Iapani mo se isi o a tatou galuega tele i le lumanai.
O le Uafu i Matautu, lea ua iai le ioega a Iapani e fausia i se taimi o le tausaga nei. O le faasa‘oga lena, e ui sa ave foi le talosaga ia Iapani mo le Malaevaalele i le lua tausaga talu ai.
E anoanoai mau atinae tetele o loo ua mae‘a fuafua ma faatalitali a tatou Malo agalelei latou te faatupeina. O lea la ua vavala mai pau lena o le atinae o fuafua ma faatalitali a tatou Malo agalelei latou te faatupeina. O lona uiga pau lena o le atinae ua oe mai i ai Iapani e amata ona fausia i se taimi o lenei tausaga.
I le taimi nei e 4 piliona tala Amerika ua faavagavaga e le Malo Saina mo atinae tetele e auala mai i nonogatupe e māmā aiaiga o loo aumai ai i atunuu e 10 o le Pasefika e aofia ai ma Samoa o loo fai paaga ma le Malo Saina.
Ma sa faapea ona toe oo i ai saunoaga a le Peresetene o Saina i le fonotaga i le masina talu ai a o auai le Afioga i le Palemia Susuga Tuilaepa Lupesoliai Sailele Malielegaoi, faatasi ma Taitai o malo laiti o le Pasefika i Fiti. O feiloaiga ia sa toe talanoa ai foi le Afioga i le Palemia ma le alii Peresetene tatou te moomia le toe faamama avega atili o aiaiga o a latou fesoasoani ia Samoa. Ae o le 2007 na faamagalo ai foi e le Malo Saina isi a tatou nonogatupe na muamua atu e tusa ai ma tatou talosaga.
O se Malo faavasivasi tele le folafola mai o fesoasoani tetele faapea tatou te agavaa i ai, ae na o lo tatou nonofo ma matamata ae tufi tauufao e isi Malo atamamai o le Pasefika. Na faaiu saunoaga a le Afioga i le Palemia, O manatu ia e tetee ai ia Saina, o loo nanā ai lalo upu soona lafo taufaifai manatu faasausili ma le faailoga lanu.
Ai ana aumai mai papalagi Siamani fesoasoani ia e leai lava se tatou ola faalagolago. O lea foi ua faatagā pele Iapani, ae faasagatau ia Saina ia latou faitioga. O le faapogai moni o lo latou tetee ona o galuega nei o loo fai e le Malo e pito leotele i faiga filifiliga a tagata palota i le Faiga Palota o loo loma nei.
E mamao lava ma matou o faatautaia le Malo ni manatu i le palota. Pau lava le itu matou te faatāua, Ua valaau le Atua i o matou tagata, tutū loa i luga ma o e atiae ma sana atiae pea.
Sa tali lelei le alofa tunoa mai Malo agalelei. O isi auala ia o loo faaauala mai ai e le Atua lona alofa ia Samoa, ae faiaoga i ai o tatou tagata.
