“O se tina finau ma faamuamua i so o sana galuega, o ia o le Samoa”
O molimau o le soifua galue ma le soifua tautua atunuu o se tasi o tina lauiloa o Samoa le afioga Leaupepe Taulapapa Faimaala Martha Phillips, na iloa ai o ia o se tasi o tina na tulaga ese foi lona soifua auauna i le Malo, o aiga ma nuu aemaise o le lotu.
O se tina na muai mua i malae i le sao o tina ma tamaitai o Samoa i upufai o Malo ina ua avea ma faipule o le Palemene mai le tausaga e 1970 i le 1973 ina ua 39 tausaga o lona soifua ao ia umia le suafa Taulapapa.
O le itumalo o Palauli i Sisifo sa avea ai o ia ma faipule ma o ia foi le uluai tamaitai o le atunuu i lea vaitau na lotolotoi i upufai ma le tofi faipule sa fulisia i le itupa o alii.
O se tina e tele ni matatia na ia ausia auā e lē gata o le tamaitai muamua na avea ma faipule o le Palemene, ae o laua foi ma lona alii poo lona toalua le afioga Vaovasamanaia Filipo, le ulugalii muamua na umia tofi faipule i se paeaiga faapalemene.
O le itu sili ona mataina ai lea tulaga o lona soifua ona o le itumalo o Palauli i Sisifo lea na muai pale mai ai i le tofi faipule na see atu i ai lona toalua ma tauva ai i le palota tele a le atunuu i le tausaga e 1973 ma manumalo mai ai.
O le palota lea na tauva ai o ia i le itumalo o lona tuaa poo lona tamā o Aana Alofi numera tasi a o ia umia le suafa Leaupepe ma manumalo ai ma avea ai ma faipule o lea itumalo. E avea uma i laua ma faipule i le paeaiga o le 1973 i le 1976 ao avea le afioga i le Tamaaiga Tupua Tamasese Lealofi IV. Na avea foi lona alii le afioga Vaovasamanaia Filipo ma Minisita o Tupe i le paeaiga lava lea e tasi.
O galuega a le faamasinoga o fanua ma suafa i lona amataga sa na o alii lava sa tofia e avea ma faamasino peitai na tata‘e foi e Leaupepe le matatia ina ua avea ma uluai tamaitai e pale atu i lea tofiga, ae na o le tolu tausaga na galue ai ae toe faamavae ina ua toe foi i Niu Sila ua faamautu ai ona alo ma lona aiga.
O se tina osi aiga tele e pei ona molimau ona alo ma ona aiga. E lē fia nofonofo Leaupepe pe a iai se faalavelave ua tupu. O se tina foi e alofa i lona aiga. O le molimau a le afioga i le Ao o le Malo na ia sa‘afi ai i le atamai o lea tina i le siva faataupou aemaise o lona lalelei i aso o lona talavou.
Na molimau foi le Ao o le Malo le afioga Tuiatua Tupua Tamasese Efi o Leaupepe poo le afioga Taulapapa Faimaala o se tina e loloto ia te ia lona tulaga o se tamaitai Samoa e ala i ona tiute faatausala.
E tāua foi ia te ia lona lotonuu auā na saunoa le Ao o le Malo, o se tina e finau tele mo mea lelei mo Samoa. E faaluaina lea itu ina ua molimau le afioga i le Palemia susuga Tuilaepa Lupesoliai Sailele Malielegaoi, i le aulelei tele o le tina ma le poto foi e siva faataupou.
Na saunoa ai le Palemia ma ia faailoa e lē o toe vaaia le ituaiga o siva lea sa faatino e Leaupepe i aso nei. Ua taumafai ai pea le Malo e toe fdafagu mai siva Samoa moni e pei o le saasaa a le taupou e tinoao ma faamaneenee pe a siva.
O le lotonuu o lenei tina ma tāua ia te ia o ia o le Samoa, na faamatala ai le Palemia i se tasi o fono faavaomalo sa malaga ai Leaupepe ma lona alii le afioga Vaovasamanaia Filipo a o avea ma Minisita o le Malo.
Saunoa le Palemia ina ua agai atu taavale i le faletalimalo e momoli sui o Malo i le nofoaga e faia ai le fono sa tofu taavale ma fu‘a e faailoa ai Malo taitasi. Peitai ina ua alu atu le taavale mo Leaupepe ma lona toalua, e leai se fu‘a o Samoa.
Na fiu lona alii e tauanau la te malaga pea, ae o le tala a Leaupepe a leai se fu‘a o lona atunuu i luga o le taavale e lē alu.
Na tuumalo Leaupepe Taulapapa Faimaala i Niu Sila i le Aso Lulu 4 o Iuni 2014, ae o le Aso Toonai 7 o Iuni na molimoli mai ai i Samoa lona tino maliu mo ona sauniga mulimuli ma lagomau ai. O lona manao lea na ave i le fanau ia aumai o ia i lona atunuu ma lona aiga i Tulaele e taoto ai.
O lona manao foi ia lē faasalalauina lava lona tuumalo ma sa faia lava e pei ona toatele le atunuu aemaise i latou e silafia ma masani o ni uo foi i lenei tina sa latou le silafia. O le Aso Lua 10 o Iuni 2014 na faia ai lona sauniga faalelotu i le hall o le Ekalesia Faapotopotoga a le Atua i Lotopa ma lagomau ai lava i lona aiga i Tulaele i le aso lava lea.
O le a lē galo lenei tina aogā mo le atunuu. O le tausaga e 2005 na faaee atu i ai se pine taualoa e le Malo o Samoa e amanaia ai le maualuga tele o lona sao i le atunuu ma le Malo. Manuia lau malaga Leaupepe Taulapapa Faimaala!
