Ua savali i le tolu vaiaso talu ona kiki faatū sa‘o le polo o le tatalaina o le sailiga siamupini IRB i le vaega lalo o le 20 tausaga le matutua, le Junior World Championship o loo talimalo ai nei Niu Sila mo le taimi muamua, e pei ona faagasolo i malae taalo i North Habour, Eden Park ma le ECOLight Stadium i Pukekohe.
E 12 atunuu o loo tausinio i le taamilosaga i lenei tausaga ma o le Pool C o loo finau mai ai Samoa faatasi ma Niu Sila, Aferika ma Sikotilani. O nisi nei o ‘au malolosi i le taamilosaga o loo fetaui ma le Manu Samoa laiti o le ala faigata foi lea o le taumafaiga a si a tatou ‘au.
Ua fā taaloga ua mae‘a a le Manu, tasi lava le taaloga na manumalo ai o le fetauiga ma Sikotilani, 27 Samoa i le 18 a Sikotilani, mataina le taaloga lea ona e ui i le saoasaoa o le faatamoega o le polo e Sikotilani, peitai na maua lava avanoa e kolosi ai e Samoa le laina sikoa ma toe fao ese mai ai le manumalo semanu e faaletonu foi.
O le taaloga muamua a le Manu talu ona amata le taamilosaga, na taaalo ai ma le ‘au a Niu Sila, faavavai ai e le All Blacks i ‘ai e 48 i le 12 a Samoa, e ui a i le faiaina, peitai, o loo malosi lava le puipui atu semanu foi e savavali ai Niu Sila i si a tatou ‘au.
Manaia le taaloga ma Aferika i Saute, o se tasi o ‘au malosi i le taamilosaga, auā e ui lava na lē manuia foi taumafaiga a le Manu, ae na o le 21 ‘ai na manumalo ai ia Samoa e 8. O lona uiga o loo maua tele lava le avanoa e mafai ai ona finauina e le Manu sona tulaga lelei i le sailiga siamupini o loo faagasolo nei.
O le taaloga na se‘i mavae atu i le faaiuga o le vaiaso na taaalo ai ma Ausetalia o se taaloga faigata ma sa finau foi. Na muamua lava tau ‘ai le Manu i le lima minute muamua o le taaloga, ma sa iai le manatu maualuga o le a aveave ai faapea.
Peitai i le maitau atu e moni e malolosi tamaiti ae fai lava sina gese teisi o le gaioi ma le faasologa o polo, faaletonu le sikalamu, tele foi le polo pa‘ū, o le ala sao foi lea o Ausetalia ona o le tele lava o le faatamala.
O le ‘au e lelei atoatoa le tapenaga, lelei foi faitino o tama pe a faatusa i nisi o ‘au, peitai sa maitauina e moomia le toe tapena o le mafaufau i le faatinoga o le taaloga ma ia lelei le communication a tama taalo.
Nai sasi laiti lava o loo moomia le toe faaleleia mo le taumafaiga a si a tatou ‘au. Ae ui i lea, o loo iai nisi o tama taaalo iloga o le a tulai mai i se taimi o i lumanai e ono taaalo mo le tatou Manu Samoa matutua. Na mae‘a le taaloga 53 Ausetalia i le 16 a le Manu Samoa.
Talosia ia i le taaloga ma Wales i le faaiuga o le vaiaso nei, pe faamata o le a toe faapipii ai apaau o le Manu laititi se‘i toe lele tasi mai ma se manumalo i lenei Junior World Cup e saili le tulaga fitu, ae a leai loa, ia masalo ua taunuu ai le faleaitu a Tofiga ma Ete, ua ala ona faia‘ina le Manu Samoa, ona ua faatino taga o le haka ma tase‘i mai i fafo ‘o lo‘u loto lea, o lo‘u fatu lea’ ae ua galo ona toe tuu i totonu, ua taaalo ua leai ni fatu leai ni loto.
Talosia ia ia manuia taumafaiga a nai alo ma fanau i lenei vaiaso.
