O le mae‘a ai o le valu o aso o faatino i Perisipeni le tala o le Mau a Samoa, na toe molimanao ai Kuiniselani se‘i toe faatino lava i ni po se lua ona ua aave ona tala i nisi sa lei mafai na maua le avanoa muamua.
Ua sa‘o lava le tala, ‘E talitonu lava le toeaina Savaii o Toma ina ua vaai’. O le ata faatino o le MAU AND THE VISITOR e pei ona lausilafia, o le uluai taimi lea ua faatinoina ai ma maimoa i ai le toatele o tagata ma ua lē uma le molimanao pea auā o nisi sa tala‘i atu le tala e maua ai le loimata maligi, o le ‘ata, alofa fiafia ma le nutimomoia ae sili ai le fia faitatala pea i le tamaitai o Sinalei ma le alii o Richard Wallace.
E lē mafai e upu ma tala ona faamatala le maoae o le faatinoina o lea foi vaega o le talafaasolopito o si o tatou atunuu i aso ua mavae, lea ua toe fafagu mai i tupulaga lalovaoa ma le toatele o isi augatupulaga sa lē mafai ona mauaina ia taimi.
O le agavaa o tupulaga talavou i alii ma tamaitai sa latou faatinoina le Mau, e lē gata o le agamalie ae o tomai ma gagana sa faaaogāina e i latou nei. E maofa le loto ma le mafaufau i tomai na tuuina e le Atua i le afioga ia Pulotu Canada Alofa McCarthy ma le afioga ia Aumua To‘afa Te‘o sa fatufatu ai ma aoaoina le toe lalagaina o lenei tala atoa ma faatinoina, ae lē gata i lea o le toatele o i latou o loo fesoasoani ma lagolagosua ua tino mai ai lenei faamoemoe.
Malo le finau i mea lelei ma le lagalaga i mea lelei Pulotu Canada ma Aumua. O le olaga lenei tatou te soifua ma ola ai, e tele taleni e auamaia e le Atua e tatau ona faaaogā ma tufa atu ma ia maualuga ai pea le viiga o le Atua.
O le kamupani a le Enchiro Laei, Containers ma le Screen Printing sa lagolago malosi i le faamoemoe na mafai ai ona faatino i totonu o Perisipeni le afioga ia Galumalemana Naea Tagaloa Timoteo ma le faletua ma le nofoaalo, faapea le susuga ia Mika ma Diane Nansen sa fesoasoani mo le tele o seleni sa faatino ai le faamoemoe ma nisi lava o Samaria agalelei.
Ua iai nei le fuafuaga o le pule sili o le Mau o le a taliu atu mo Melepone i le vaiaso fou e faaauau ai le tatou ata.
O le tāua tele o lenei talatuu a le atunuu ma lona faatinoina, o le taumafai lea e faailoa i alo ma fanau le pologa sa āsa mai e tuaa, ma le mafuaaga na amata mai ai le tutoatasi o lo ta malo.
E ui ina faigata ona talia e fanau pe a faamatala i ai e mātua, peitai e toatele nisi o le uluai taimi lenei ua vaai ai i le ata o le nofo pologa sa iai Samoa i aso ua mavae, ma e maofa i lona mafuaaga na afua mai ai le tutoatasi ma le uiga ma le auga tonu o le upu “Mau”.