E lē o ‘asa lava masina ole tausaga ma le tutupu mai o faafitauli ile sauaina o tina poo tamaitai i totonu o aiga, ile oo lea iai ole lima ole tamā poo nisi faafitauli oloo tulai mai ile itupa o tamaitai e pei ona silafia ele mamalu ole atunuu.
Pe tusa ma le lua vaiaso talu ai na tulai mai ai foi se tasi o faafitauli ile pitonuu o Magele lea sa maua ai se pepe ile paka ua maliu ma le tele ma le anoanoai o nisi faafitauli oloo tulai mai i lenei vaitaimi i tina.
Ile taumafai ai la ole malo e saili ni fofo poo ni auala e taofia ai lea faafitauli, ae ua maitauina ai foi le taulamua ai ose tasi o alo ole atunuu le susuga ia Toaletai David Tua ma lona faletua ia Helen, e faatino se polokalame e faamalosia ai le taofia ai ole sauaina o tina i totonu o aiga. O lea faamoemoe sa faia lea ile Manhattan i Mt Roskill ile po ole Aso Faraile ua mavae 2 o Tesema.
E silia ile 300 i latou sa lolofi atu ma molimauina se polokalame uigaese ile taumafai lea e faailoa atu ile lautele ole atunuu ua tatau ona taofia le sauaina o tina ma tamaitai.
Ua filogia eseese lea po i tagata mai atunuu eseese mai lava i tagata matutua seia oo lava i tupulaga talavou, ua o atu e lagolago a latou tama ma teine taaalo lea ua ofoina o latou tagata e faatino ai lenei polokalame tāua e ala i fusuaga.
Ole susuga ia Toaletai David Tua ma lona faletua na saunoa e faafeiloai le mamalu ole atunuu, aemaise nisi o sui o Local Boards ma le Afioga Aupito Su‘a William Sio ma lona faletua sa faatasi atu ai foi i lea po.
E 11 paga fusu sa faatinoina ai lea faamoemoe, o nisi lava o fanau tama ma teine e fiafia i lenei taaloga ole faipele, poo nisi foi o sui oloo galulue faatasi ma le afioga ia Toaletai David Tua ma lona faletua ma oloo koleni ai foi ile falekoleni o Toaletai na filifilia mai ai i latou e faatunuuina lea faamoemoe, lea e silia ile 30 tagata oloo auai.
Saunoa Toaletai David Tua e lei faigofie ona faatapena lea polokalame, e fai lava si faigata ona o koleniga mo tama ma teine fusu, e 12 vaiaso lea sa taumafai mai ai lea faamoemoe.
E ui ile faigata ma le puupuu ole taimi ae o lona loto faafetai ile Atua ua faataunuuina ma le manuia le taumafaiga oloo taumafai e lagolago ai le taofia o le sauaina o tina i totonu o aiga. Ole agaga maualuga o lea tamalii ole atunuu, ia taulamua o tatou tagata i mea lelei mo totonu ole tatou komuniti, auā e iai lona lagona e leai se aoga e tautaua ai i isi mea ae o lea e iai mea lelei ia e tatau ona taulamua ai auā le lelei o o tatou tagata Samoa ma le Pasefika.
E maeu le silasila ale mamalu ole atunuu i lea afiafi ile taumafaiga a lea tamalii ole atunuu, auā na maitauina le galulue faatasi o tagata uma ile faasoasoaina o paga fusu ae faapea foi ia i latou oloo gaseseina le taumafataga.
E maua le ‘ata ile mālie o paga ae tele se feau sa momoli mai ai i fusuaga ile ofoina o soifua o nei alo ole atunuu e faailoa lo latou lagolago e taofia ai le sauaina o tina i totonu o aiga. E lē gata ile fasi poo le oo iai ole lima, ae o upu lafo foi e ono manu‘a ai le loto ole tina.
Ma ole taualuga o lea po e mae‘a lava le paga fusu ma tauaao le ipu ile tagata e manumalo ae tuuina atu le pine ile fu‘a faia‘ina. E taaalo lava tama o uso e maua lava le fealofani ma le galulue faatasi.
