Ole tausaga e1816 na faavae ai le Malisi ile lalolagi, ma ua oo mai i lenei tausaga ma ua atoa iai le 200 tausaga talu ona faavae. Ma ole faamanatuina o lenei aso fanau oloo tele lava ina faamanatuina e Malisi ile lalolagi atoa, ae o lea ua oo mai iinei i Niu Sila ma ua a‘e ai foi se tofa ile sosaiete a Malisi ile itu Samoa i Aukilani e tatau foi ona faamanatuina e Malisi le atoaga ole 200 tausaga.
Ole afiafi ole Aso Toonai ua tuanai, 3 o Tesema na faatumulia ai le Maota o Samoa i Magele ile mafutaga a Tama tuai a Malisi, o i latou sa aoaoina i aoga eseese ale Ekalesia Katoliko i Samoa ae o lea ua mafai ona toe tuufaatasia e ala ile faamanatuina ole 200 tausaga o Malisi.
Ua lē gata i alii ae ua oo foi i tina poo tamaitai sa aotauina ile aoga a St Marys i Samoa ua mafai ona fiafia faatasi ma nisi o o latou tuagane e molimauina le alofa ole Atua e ala i nei tausaga e tele talu ona faavae mai le Malisi.
O nisi o Felela ma Taupousa faapea nisi o afioga i Patele sa vaaia foi lo latou sagisagi fiafia ile matagofie o uso ae nonofo faatasi. Ose faamoemoe sa fau ao fau po ae sa taumate foi pe tua ini ā lenei tapenaga, ae ole viiga ma le faafetai ile Atua sa pepese ma aleluia ai le aufaigaluega totofi ale Atua sa auai, ona o lea ua faataunuuina ma le fiafia lenei faamoemoe e pei ona avea ai Bishop Stuart O’Connell ma ositaulaga e amataina le polokalame.
Ole tofa ia Seumanu Francis Ioane sa fai ma fofoga ole po ae ole afioga ile Konesula ole malo o Samoa ia Faolotoi Reupena Pogi ose tasi foi o tama tuai ole Malisi, na saunoa ile saunoaga autu e faafeiloai ma faatulima ai le paia ole auvalaaulia aemaise o malo faaaloalogia.
Ole saunoaga autu mo le talafaasolopito ale Malisi na saunoa iai Brother David, ose tasi o Felela ua leva ona avea ma faiaoga i Samoa i Mulivai, St Joseph faapea foi Ulimasao, ona sosoo ai lea ma le feulaina ole keke e Sister Emerentiana.
Ole tele o nisi o faafiafiaga eseese na saunia ele Tatau Dance Group faapea nisi o aufaafiafia a‘o alo atu le mamalu ole atunuu ile taumafataga. Ae lē gata i lea ole alofa tulai o nisi o aiga uo ma ē masani aemaise teine tuai ole St Marys na saunia a latou faafiafiaga e momoli ai lo latou agaga fiafia ma faamanuiaga ile atoaga ole 200 tausaga o Malisi.
Ise tasi vaega tāua i lea afiafi o tufatufaga faailoga ale ‘au a Malisi ile latou aulakapi ile sefululima ma le taitoafitu sa tausinio i lenei tausaga ile Aukilani Samoa, ma o nei faailoga uma na tapenaina lea ele mafutaga a Malisi i Aukilani.
Faatasi ai ma faailoga faapitoa sa tuuina atu lea i nisi o tamalii ua leva foi ona tautua i totonu ole Sosaiete a Malisi e pei ole afioga ia Tuifaasisina Tafili Betham lea ua silia ile 50 tausaga o lana tautua ile sosaiete, ma o ia foi ole faatamā o Malisi i Aukilani.
Ole susuga ia Gaono Mike Schmidt, Fiaailetoa Viane Tuputala, Aniseto Lang Wai ma Moefaganoa Savelu Kapisi, o i latou ia ua silia ile 30 tausaga ole latou auaunaga i lenei foi sosaiete ma le au ta‘i 20 tausaga ole latou tautua, ole susuga ia Toleafoa Tuimauga, Luafalealo Laulu ma Poumau Lilo.
O ni faailoga na tuu aloaia ia i latou ma ua avea ma luitau a faamalosiau ile latou tautua, ae ua avea foi ose agaga faafetai o nei tamalii ile Alii ona ole soifua tului ma le ola maloloina mai le Atua ua mafai ai ona galulue i lea Sosaiete e manatua ai pea aoga sa fofoa ma faafailele mai ai le olaga aoaoina.
O upu mulimuli ole po na saunoa faafetai ai le Peresetene a Malisi le afioga ia Leota e momoli le agaga fiafia o Malisi ma le loto faafetai ile mamalu ole auvalaaulia, faatasi ai foi ma le faafetai ile faipule o Magele le Afioga Aupito Su‘a William Sio faapea afioga i Patele ma Taupousa sa afifio atu, ua maualuga ma matagofie ai le faamoemoe o Malisi.
