“NEITA” o le faapuupuu o le National Excellence in Teaching Award. E faailoa ai e le malo faiaoga e sili ona lelei i le faatinoina o a latou mataupu ma tofiga. I lenei tausaga sa faatūina mai i itu eseese o Niu Sila faiaoga e silia ma le 600. Ma sa faatūina ai ma le alii faiaoga Samoa, le susuga ia Perenise Tauanuu mai le aoga i McAuley.
Muamua, na manaomia e saofaiga poo le Panel a faamasino, se tusitusiga mai ia Tapu e tusa ai o le mafuaaga ua ia filifilia ai lea galuega o le faiaoga.
O le tali a Tapu: “Ou te fia manao e lelei atoatoa la‘u faasamoa ma le faaperetania, ma ou te manao foi ia faapea lo‘u aiga.
O le naunautai ia lelei fanau i le gagana ma le aganuu faasamoa. E tele tupulaga ua lē lelei i le faasamoa poo le faaperetania, ua lē iloa foi poo ai i latou. Ua amata ona o ai la‘u fanau.
E ui o lo‘u faailoga o le Igilisi, ae leai se aogā o le Igilisi ae lē a‘oa‘oina tu ma aga faasamoa, o le anava mai i le Atua. O le amataga lea na ou faiaoga ai, i le Gagana Samoa.”
O le masina o Me na filifilia mai ai i le 600, le to‘a 20 e o i Ueligitone mo le isi laasaga o le filifiliga. E to‘a 10 pule aoga ma faiaoga e to‘a 10 foi. O Regional finalists ia poo ē ua manumalo mai i itumalo eseese o Niu Sila.
E na o Tapu le Pasefika ma nai faiaoga Maori e toalua ae o palagi uma lava. Sa fai e Tapu lana tautalaga tauva (speech) i faamasino poo le Panel. Na mae‘a ona talia lea o le Award poo le faailoga mo itumalo Regional Finals. Sa fai ai foi le taumafataga ma sui o le Palemene i le fale fono.
O le ulutala o le tautalaga a Tapu na fai: ‘The Pasefika face of Catherine McAuley.’ E faatatau lea i le latou aoga, McAuley High School, ma suiga ua iai nei. Na amata i le 1966 o palagi uma, ae o le taimi nei ua toe toalua tamaiti palagi o iai, ae o tamaiti Pasefika uma lava.
O le fesili aisea? Ona o suiga ua iai nei Aukilani ma Aotearoa. Peitai e sui foliga, ae tumau pea le faavae. E tumau pea le malosi o le faatuatua faaleaoga a le Katoliko, o aoga a le lotu. E tumau foi le galue ia numera tasi le laumua i le NCEA e pei ona iai nei.
O le vaega lona tolu o le filifiliga a le Panel, o le tusia lea o se Tusitusiga (essay) e 3,000 upu e ta‘u atu ai se faafitauli tau le a‘oa‘oga o iai nei, o sau metotia e foia ai lea faafitauli, o le afuafuaga o lea metotia, o lona faatinoga, ma ni fua poo galuega lelei o maua mai ai e le fanau.
O le faafitauli sa fai agai i ai le tusitusiga a Tapu, o le maualalo pea lea o maka o tamaiti Pasefika i suega a le malo (The Underachievement of Pasefika Students in National Assessment.)
E tatau ona malosi pea le a‘oa‘oina o soo se mataupu, ma ia toaga e faitau tusi ma suesue. Ae o se tasi o auala e foia ai lea faafitauli, o le faamalosia lea o le gagana a le tamaitiiti i soo se mea, e aofia ai ma le a‘oa‘oina i le aoga.
Aisea? O lona faamalamalama lea e tilotilo ai pea i le lalolagi, ma fesootai ai ma lona aiga, lotu, aoga, ma uo.
A malamalama le tamaitiiti i feau tāua o le gagana ma le aganuu faasamoa i lona siosiomaga, o iinā o loo afifi ai le ‘oa e tele i le Tusi Paia, tusitusiga, pese, solo, lauga, folafola ava, folafola sua, ma isi aganuu faatino.
O nisi o ē suesue (Research) ua latou faamaonia a malosi le tamaitiiti i lana gagana ma lana aganuu, e malosi foi o ia i isi mataupu ma gagana e a‘oa‘oina. O le ala lea o le faamalosia o le Gagana Samoa i McAuley ma isi aoga e pei ona iai nei.
O lea la ua maua mai National finalists. O le award ma le tino i tupe e $2,500. E momoli ai le faafetai i le Atua a le auauna ona o le faamanuiaina o ia i nei foi faailoga tāua.
