O le vaitau o galuega faaiu ma tapenapenaga mo le aga atu i le tuuaga umi a aoga mo lenei tausaga.
O tala faatino, o siva, pese, o taaloga, o vaega uma ia o le faaaliga o tomai, taleni, ma le iloa o le fanau aoga, e ese mai i le tomai ma le poto a‘oa‘oina i le aoga e pei ona masani ai.
O se vaiaso pisi le vaiaso na tea nei, i se tasi o aoga i Aukilani, Otahuhu Intermediate School, auā e lē gata o le vaiaso o suega faaiu, o taaloga afeleti, aemaise o le pisi i le tuufaatasia o se tala faatino e pei ona iai le po o le Aso Tofi na tea nei.
O le taimi muamua lea ua faaali ai i luma o mātua, aiga, uo ma ē masani, le latou tala faatino ua faaigoaina The Wizard of OZ tearoa.
O se tala e faatatau lava i se tusi faitau a tamaiti aoga, ‘The Wizard of OZ’ ma ua loa foi tausaga o lenei tala e pei ona muai faalauiloa i se ata tifaga i totonu o Amerika i le tausaga e 1939. E fiafia tele i ai tamaiti aoga, auā o se tala e pei e faamatalaina, i se tulaga faamaneta, e pei ona autū i se teineitiiti laititi, na faafuasei ona afatia le savaliga, ma lelea ai agai i se nofoaga ua faaigoaina o OZ. O lona taumafai ina ia toe foi i lona aiga na mafua ai ona fetaui ma nisi o uo na te lei iloa muamua.
E matagofie le faatinoga e le fanau aoga o vaega eseese o le tala, ma na faamalieina le aofia na maimoa i le mālie o aga a le fanau aoga.
E iai le talitonuga, o tala faatino faapenei, e afua ai ona amanaia ma oo atu nisi tagata i le faatinoina o ata tifaga tetele.
Na saunoa faiaoga faatonu, Miss Kersley ma Mrs Devery, E lei faigofie le tuufaatasia o lenei faamoemoe, auā e tele se taimi sa moomia e a‘oa‘oina ai, ae e iai foi isi vaega o le aoga e tatau ona auai atu i ai tamaiti ia sa faaaogā i le faatinoga o le tala.
E ui la i le utiuti o le taimi sa faaalu, ae maeu lava le matagofie o le faatinoga e le fanau o le tala, ‘The Wizard of OZ-Tearoa’. Na matuā sioa le aofia i le maofa a o faasoa mai taleni a le fanau aoga e ala i le faalauiloaina o taleni pese, siva ma le faatinoga o le latou tala.
Na mautulaga nisi o fanau Pasefika i lenei tala faatino, e pei ona iai le toaono o tamaiti Samoa mai le 11 tausaga e oo atu i le 13 tausaga le matutua sa auai i le faatinoga o le tala. Pei ona silafia, o le Otahuhu Intermediate School, e na o le lua vasega, o le tausaga 7 ma le tausaga 8, e faasauni ai le fanau mo le ulufale atu i Kolisi maualuluga.
Ma o le amataga o le tausaga, na amata saili ai (auditions) i latou mai tausaga nei e lua, e mafai ona auai i le faatinoina o lenei tala, lea na mautulaga ai nei fanau Samoa sa filifilia mai le sailiga, e aofia ai le tamaitai na faaautū i ai le tala.
O Dorothy, na filifilia i ai le tamaitai o Jireh Mamea, Scarecrow na faatinoina e Josie Faamasoli, o le Narrator o Taiupu Poasa, Flying monkeys o David Mottram, Trees na filifilia i ai tamaitai Samoa e toalua, Georgina Cortz ma Fia Tagaloa.
O alo nei o Samoa na filifilia mai le toatele o tamaiti aoga sa audition mo lenei faamoemoe.
O se tulaga ma se maka lelei mo fanau Pasefika aemaise tamaiti aoga Samoa, pe a tulai mai i ni tulaga taualoa, e siitia ai le taumafai i totonu o aoga aemaise totonu o lenei atunuu o Niu Sila.
