O le Aso Gafua e oo i le Aso Faraile o le vaiaso talu ai sa tatau ona faatino ai polokalame mo le siitia o le soifua malolosi ma le soifua lelei o le atunuu e pei ona faailoa mai le sini o le vaiaso o fesuiaiga o le olaga e soifua maloloina, le healthy lifestyle week.
O se suesuega i le tausaga e 2002 e ta‘ua o le health steps survey a le matagaluega o le soifua maloloina na iloa ai le toatele o le atunuu e lē faatāuaina le soifua manuia o o latou tino, ae o le toatele ua naunau i suiga o le soifuaga e aafia ai le tino i ni tulaga maaleale ma ogaoga ma puupuu ai ma le soifua ona o ma‘i ua aafia ai le tino.
O le suesuega lea na iloa ai foi e tusa ma le toalua alii mai le aofaiga e toalima e ulaula tapaa ae 15 pasene o tamaitai i le atunuu ua tagofia le tapaa ma tele le inu i le ‘ava malosi.
Ua faailoa foi i lea suesuega e toatasi le tagata mai le aofaiga e toalua o tagata matutua o le atunuu e lē faia lava ni faamalositino ae toatasi mai le toasefulu e matuā leai se tausami i fualaau‘aina suamalie.
O le vaiaso la na tea nei sa taulai ai polokalame a le matagaluega o le soifua maloloina i le unaia o le soifua lelei e ala i le toaaga e faia faamalositino ma faagaioia le tino i feau a le aiga, aemaise ia taumamafa i meaai e maua ai le malosi ma le soifua maloloina ae lafoai meaai ua tatou iloa ma silafia e maua ai i le tele o faama‘i ua salalau nei aemaise gasegase lē pipisi.
O se suesuega sa aofia uma ai atunuu o le lalolagi o loo faamauina ai o fanauaoga i Samoa mai le matutua o le 13 i le 15 tausaga, ua fiafia tele i faguinu ma vaiinu suamalie, ma o le 19 tesimale 2 pasene o le aofaiga o fanau a aiga a le atunuu i le matutua lava lea, ua aafia i le tino ua soona puta.
O fautuaga mai le matagaluega o le soifua maloloina mo le atunuu ina ia faaaogā ma logosaia a o tatou iai i lenei vaiaso tāua, o le taumafa tele i fualaau‘aina suamalie, o fualaau faisua ma fualaau taumafamata.
Ia faaitiitia le tago i meaai e tele ai le suka, masima, ma le ga‘o, fai sau faamalositino a itiiti mai o le tolusefulu minute i le aso mo aso e lima, poo le sili atu foi.
Faaitiitia le ulaula tapaa poo le taofi loa pe a loto i ai, faaitiitia le tago i le avamalosi, fafaga pepe i le suasusu o le tina ae taumamao ma apasusu gaosi, ia mautinoa ia asiasi le tina ma‘itaga e vaai le fomai o ma‘itaga tau tamaitai ma tina, ia ave fanau e faia o latou tuipuipui, ia malupuipuia tagata uma mai le faaaogāina o fale lē ta‘ua i le faamamā lelei o ia nofoaga.
Ma ia mautinoa ia lava le mālōlō o le tino ma le mafaufau. O vaega uma nei ua faaalia e le matagaluega e maua ai se soifua maloloina ma se soifua malosi, fiafia ma alofia ai le tele o faama‘i.
