E iai le maitau a le taitaifono o le Pacific Rim Boxing Championship, le fetalaiga ia Pa‘u Fereti Puni, o suiga fou i taamilosaga o lakapi faavaomalo ua iai nei o se tulaga ua faamalosia ai le talitonuga i le alafua ua faataoto nei ina ia mafai ai ona siitia fusuaga faapolofesa i le Pasefika i se taimi lata mai.
O le faatulagaga fou o taamilosaga a le IRB o se fesoasoani malosi lea i le lakapi a le Pasefika, aemaise i atumotu o loo malosi ai le lakapi e pei o Fiti, Toga ma Samoa lea ua maua ai taaloga faavaomalo e taitolu e aofia ai nisi o ‘au i le pito i luga o ‘au a le lalolagi a o malaga taamilo ai i le itulagi i matu.
Faaalia e Pa‘u, “E faamoemoe mea uma i le iai o fusuaga faavaomalo e mafai ai e tama fusu mai le Pasefika ona atinaeina a latou taleni ma maua avanoa i faatulagaga o tama fusu.
O le faavaeina o le taamilosaga o fusuaga faapolofesa a le Pasefika, le Pacific Rim Boxing Championship, o se laasaga amata mo le agai i luma ae moomia tele ni fusuaga i Ausetalia ma Niu Sila.”
O le fusuaga tele na tea nei i le va o Danny Green ma Shane Cameron na manumalo ai Brad Pitt o Ausetalia i le alii Fiti o Mosese Sorovi o le aupaga o le cruiserweight i le tu‘ioti i le taamilosaga 3.
Faamaonia mai e Pa‘u e faapea, “Sa fesootai mai Ausetalia mo Vaitele Soi le siamupini a Samoa lea e lei faia‘ina i le 20 o ana fusuaga faapolofesa ae manumalo i le 14 fusuaga i le tu‘ioti e fetaui ma Brad Pitt, peitai e lei manuia lea fetuunaiga.”
Fetalai Pa‘u, “O le fusuaga mataina lea o le 2013 pe afai ae taunuu, o le fetauiga a Brad Pitt o Ausetalia ma Vaitele Soi o Samoa. O alii fusu nei faapea Shane Cameron o Niu Sila pe a tumau i le aupaga cruiserweight, ua agavaa e fusu i fusi faaitulagi o le lalolagi.”
I le aupaga o le lightheavyweight, na faaalia e Pa‘u e faapea, “Ou te fia vaai ia Warren Fuiava o Samoa lea e lei faiaina ua fetaui ma Robbie Berridge o Niu Sila i se fusi i le toesea o Soulan Pounceby ae lei oo atu ia Blake Caparello o Ausetalia.”
“O loo iai le mataupu e lei uma a Pele Faumui o Samoa lea e fusu ma le siamupini o Fiti i le aupaga o le middleweight i le vaiaso nei i Nadi ma Gunnar Jackson o Niu Sila. Talitonu o le a sili atu se fetauiga a Pele ma Gunnar nai lo o le la fusuaga lea na tutusa ai i paga faaopoopo o le fusuaga a Tua ma Demitrice i le tausaga ua tuanai.”
O le alii fusu Samoa o le aupaga o le welterweight ia Leti Leti e lē o taaalo i le taimi nei ae o loo tele lava le avanoa i le lumanai. Faaalia e Pa‘u, “O Leti o loo mafuta i lona aiga i le taimi nei ae leai se mafuaga e lē mafai ai ona amata ona toe fusu i le tausaga fou.”
O se tasi o paga mataina o le 2013 pe a mafai ona fai i le faamatalaga a Pa‘u, o se fetauiga a tama matutua o le maea ia David Tua ma Kali Meehan i Nadi poo Apia.
“O Tua o Samoa ma Meehan o Fiti o loo avea ma faataitaiga lelei mo le toatele o fanau o loo naunau i le faipele. O se tulaga o le a matuā siitia ai fusuaga i le Pasefika pe a mafai ona faia lea fusuaga.”
Tasi le mea mautinoa i le faaaliga a Pa‘u, “Ua tatau nei ona taofia tamafusu Pasefika e toe fusu i Niu Sila ma Ausetalia ae lē o lava sauni i le manao vave i se tupe ae faaleaga ai le taulelei o fusuaga ma faatauvalea atunuu.”
