O le faaee atu o le suafa Tagaloa o le aiga o Aggie Grey i Toamua lea o loo nofoia ai le suafa Pepe e se tasi o alo ma tamafanau o le aiga, le susuga Pepe Christian Fruean, o se faaaloalo maualuga mo le Peresetene o Tahiti sa ia afea Samoa ma se aumalaga e 300 ona o le fia auai i le tatalaina o le faaopoopoga fou ma le toe faafouga o le faletalimalo fetulima ua suia nei lona igoa o le Samoa Sheraton Aggie Grey hotel and Bungalows i Vaisigano i Apia.
Ua siitia ai nei le faletalimalo i se tulaga sili ona maualuga ua laina tutusa ai ma faletalimalo five star o le lalolagi o le Sheraton. Faaalia e le alii Peresetene ina ua maua se avanoa e fesiligia ai e tusitala, o le faaaloalo e ala i le suafa Tagaloa ua ia lagona ai le vavalalata o sootaga o tagata Tahiti ma Samoa.
O se finagalo e ono mafai ona fetaui lelei ma le fetalaiga a le tofa Ulu Vaomalo Ulu Kini o se matai o le nuu o Toamua, o le suafa Tagaloa e fesootai ai le talafaasolopito o atunuu o le Pasefika. E tasi lava le Atua o tagata Polenisia sa tapuai i ai, ua na o Tagaloa i Samoa a o Tagaroa i atunuu e pei o Tahiti, le Atu Kuki ma Maori i Niu Sila. O le malaga asiasi mai i Samoa o le alii peresetene sa ia faailoa ai nisi o taumafaiga o loo tau fai galulue ai nei ma le Malo o Samoa. Ua ia faaalia lona naunau e faatino se fesootaiga ma Samoa i malaga a vaalele a lona atunuu, ae o lona faanaunauga e tatau ona galulue faatasi ma kamupani vaalele a isi atunuu e pei o Niu Sila ma Ausetalia. O lona finagalo foi o se tautua e manaomia e tagata uma o atunuu o le Pasefika ina ia mafai ona faigofie ai femalagaa‘iga i le va o atunuu.
O se tasi o vaega na faaalia e le afioga Tagaloa Edouard Fritz o isi atinae e mafai ona malaga mai ai tagata faipisinisi o Tahiti e faagaioia i Samoa ma fai paaga ai ma le au faipaisinisi i le atunuu. E faapena foi i le aufaipisinisi a Samoa ia maua le avanoa lelei e malaga ai e faia ni pisinisi i lea atunuu ma fai paaga ai foi ma pisinisi i Tahiti.
O le susuga Laauli Allan Grey ma le pulega o le faletalimalo o Aggie Grey ua latou faatauina ni faletalimalo se 4 i lea atunuu, ma o le isi lea mafuaaga o le malaga mai o le Peresetene o lea atunuu i le tatalaina o le faletalimalo i Samoa.
Ua faatolu ona malaga mai le peresetene i Samoa, ma o le taimi muamua lava a o laitiiti ona tausaga. Na sosoo ai ma se malaga mai ni sui o lea Malo ina ua mae‘a afa tetele na afatia ai Samoa i le 1990.
O le tausaga e 2003 na toe malaga mai ai o se sui o lona Malo i le valaaulia faapitoa atu a le Palemia o Samoa i le feiloaiga a taitai o le Pasefika ma le peresetene o Farani i lea vaitaimi. O le uluai taimi foi lea na amatalia ai feiloaiga a Peresetene o Farani o loo pulea Tahiti ma taitai o le Pasefika.
