E lē taugofie le faatupega o atinae o faletalimalo auā e fai o tagata faigaluega ae o auaunaga e manaomia mo tulisi ma tagata tafafao e faamautu ai. O le tau atoa na toe faafou ma fausia ai se faaopoopoga o le faletalimalo o Aggie Grey i Vaisigano, lea ua faaopoopo i ai le Sheraton i lona igoa, e valusefulu miliona tala Samoa.
Fai mai le susuga Fred Grey, ua latalata ai nei i le tasi le afe tagata faigaluega ua faafaigaluega i le pisinisi a lona aiga, ae faapea isi pisinisi a ona mātua le susuga Laauli Allan ma Marina Grey. O le tasi lenei o pisinisi ua tele tausaga o tautua i le tamaoaiga o Samoa, ae lē natia ai le sao o le susuga Laauli Allan Grey i le atinae o le taaloga lakapi.
O le toatele o i latou sa galulue ma lea tamalii latou te silafia lelei lea tulaga e pei ona molimau nisi sa auai i le tatalaina o le vaega o le faletalimalo i Vaisigano Apia, sa nonofo ai le aulakapi o le Manu Samoa e leai se totogi ona o le taimi o le utiuti o tupe sa atinae ai le Iuni lakapi a le atunuu.
O sailiga tupe a ekalesia, o faalapotopotoga a nuu ma mafutaga a tina ma tamaitai aemaise foi o faasalalauga faapisinisi a nusipepa, televise ma leitio e agai uma lava i le susuga Laauli ma ana pisinisi mo se fesoasoani.
O le molimau ola o lona agalelei e le tuua se tupe e tali ai i se tusi aisi, ae o se faasalalauga faapisinisi mo se leitio, se nusipepa ma se televise. E ui lava ina lauiloa lona faletalimalo e lei solomuli ai lenei tamalii ma lona aiga i le fofola atu o ona aao foai.
O le molimau a se tasi o tamalii ua faauluulu ai nei le Iunivesite aoao a Samoa o lana molimau, o le pogai foi lea o le naunau o le Malo e fausia atinae e siitia ai tagata tafafao mai i Samoa ona o le vaai i le agalelei o lea aiga aemaise foi o atinae tau faletalimalo ua faaopoopo nei i le auaunaga tau tagata tafafao.
E fā faletalimalo ua faatau e le aiga o Laauli Allan Grey i Tahiti, ma o le fiafiaga lea o le taitai o lea foi Malo o le Pasefika ona o le silasila o le alo o Laauli le susuga Fred Grey e tuuina atu seleni e faafaigaluega i lo latou atunuu e ala i le faatauina ai o ni atinae tau faletalimalo.
Faaalia e Fred e limaselau ma ona tupu tagata o loo faigaluega ai i ia faletalimalo e fā.
A faaopoopo i ai ma le lata i le tasi le afe o tagata faigaluega i Samoa ona avea lea ma molimau ola o le tele o le sao o lenei aiga i le tamaoaiga o Samoa ma Tahiti.
O le toe fausia o se faaopoopoga o le faletalimalo i Vaisigano ma toe faafou atoa le faletalimalo ua maua ai le 200 o potu mo le nonofo ai o tulisi ma malo mai fafo.
Na tapunia le faletalimalo ina ua aafia i le afā o Eveni i le masina o Tesema o le tausaga e 2012.
Ua atoa ai le tolu tausaga ma le fā masina talu ona tuanai lea afā malosi ae ua faatoa toe tatala le faletalimalo mo lana tautua faaauaua i le atinae o tagata tafafao maimoa mai fafo.
