E ono tagi o le palota sa faatō‘ai i le faamasinoga o palota, ae e lima mataupu na toe ave i tua ina ua mae‘a ona teuteu i tua.
E na o le tagi tau palota lava mai le itumalo o Faleata i Sisifo na faaauau e ui na toe manatu le Itu tagi e ave i tua ona e feteenai le latou mau ma le mau a le faamasinoga i aiaiga o le tulafono o faigapalota.
Peitai o le mataupu lea mai Faleata i Sisifo sa faaalia e le tofa Ale Vena, na ia maua ai se tusi mai le taitai o le HRPP le afioga i le Palemia, na avatu ai le tuualalo e ave i tua lana tagi.
Peitai o le saunoaga a le tofa Ale, sa ave i ai lana tali tusitusia ma ia faailoa ai e lē avea i tua lana mataupu ae o lana tuualalo na ave i le Palemia, ia ave sana fautuaga i le faipule le tofa Lealailepule Rimoni Aiafi, e alu e faamavae ma le tofi o le itumalo ae toe foi e fai le palota laititi.
O le faamaoniga o le finagalo o Ale Vena ona sa tumau pea lona naunau e suesueina ana tuua‘iga o faiga faaalatua ma faiga faapiopio i le lesitalaina o le fāselau o tagata sa lē tatau ona lesitala i le lola palota a Faleata i Sisifo.
O le tagi mai le itumalo o Alataua i Sisifo o le isi lea mataupu sa laumanu‘ia ai le suafa o le Palemia i lona fia maua o le tofa Lafaitele Patrick Leiataualesa sa tagi faasaga i le afioga Aliimalemanu Alofa Tuu‘au, ona o le naunau e toe faasolomuli mai i tua ma le faamasinoga le mataupu ae teuteu i tua. O le feiloaiga a tusitala i le polokalame masani a le leitio o le 2AP ma le Palemia i le vaiaso ua mavae, na fesiligia ai le Palemia le tofa Auelua Fatialofa Lupesoliai Tuilaepa Sailele Malielegaoi i sona finagalo, pe sa‘o faamatalaga i lona lotolotoi i gaioiga e toe ave ai i tua tagi o le palota.
Na faaalia e le Palemia e leai ma se tulaga na aafia ai i se taumafaiga faapea. Na ia ta‘ua foi o soo se tagata Samoa moni e malamalama lelei i le tulaga lea, ae se‘i vaganā se tagata e lē o se Samoa moni e iai lagona o le faaluafesasi ma le lē mautonu i ni tulaga faapea.
Sa toe faamanatu mai ai e le Palemia le tāua tele o tu ma aganuu faasamoa ma o soo se gaioiga lava e lotolotoi ai, o le tāua lena o tu ma aga faasamoa ma o soo se tagata Samoa moni e malamalama lelei i ai.
O le mae‘a ona ave i tua o le tagi a Lafaitele Patrick Leiataualesa ina ua ia talia le faatauanau atu a nisi o matai o le nuu ma le itumalo, sa faaalia ai e le tamaitai loia o Iuni Sapolu, e malosi mau na ia tapenaina e tuuina atu i le faamasinoga e faamaonia moliaga faasaga i le tamaitai faipule o Alataua i Sisifo, peitai na matuā feagai lē e ana le tagi ma se tauiviga o malosiaga mai tua e ave ai le tagi i tua.
Na fesili ai le tamaitai loia pe o le ā la le uiga na fai ai e le Palemene le tulafono e molia ai ni sui tauva o le palota i ni faiga solitulafono.
