E lei talia e se vaega o le itumalo o Safata le vaevaega na faia e le Palemene i ona itumalo faapalota e lua o Safata i Sasae ma Safata i Sisifo.
O nisi o matai o le itumalo sa latou ave se sāvali i le Palemene e valuvalusia ai finagalo o le Palemene ua mae‘a a o lumanai le palota tele na faia ia Mati o le tausaga nei, lea na faaaogā itumalo faapalota e lua o Safata e saili ai sui faipule taitasi mo le itumalo ina ua aveesea nofoa e lua sa iai muamua a o tasi le itumalo faapalota.
E lei maua se tali lelei o lea savali i le Palemene na taitaia e nisi o matai e pei o le afioga Tuia Paepae Letoa, ma faapea ona faaulu ai le latou talosaga i le faamasinoga o Fanua ma Suafa mo se iloiloga i tuaoi faaleaganuu o Safata.
Peitai na faaulu ai e le afioga Leota Su‘atele Manusegi se talosaga i le faamasinoga maualuga ina ia faia ai se poloaiga e taofia ai le faamasinoga o Fanua ma Suafa i le faia o se iloiloga o tuaoi ona e le aiaina e le faamasinoga le faaiuga ua iai le vaevaega o le itumalo e tusa o le finagalo o le Palemene.
O le pogai lea o le ave o le isi talosaga a se vaega o matai o le itumalo i le faamasinoga maualuga e taofia ai le suesueina o le talosaga a Leota Su‘atele ae ia suesueina le talosaga a se vaega o le itumalo e le faamasinoga o Fanua ma Suafa auā o le faamasinoga lea e nafa ma mataupu tau i eleele faaleaganuu ma suafa matai ma isi mataupu e aafia ai tu ma aganuu a Samoa.
O le talosaga la lea na suesueina ma maua ai le faaiuga a le faamasinoga maualuga e faaauau pea ona suesueina le talosaga a le afioga Tuia Paepae o Vaiee Safata, Anapu Aialii o Saanapu Safata, ma Afemata Apelu Aiavao o Sataoa Safata e le faamasinoga o Fanua ma Suafa.
Ua teena ai le suesueina o le talosaga mo se poloaiga e taofia ai lea talosaga mai le tagofia e le faamasinoga o Fanua ma Suafa, sa faaulu e le afioga Leota Su‘atele Manusegi o Mulivai Safata, Alo Ioapo, Alo Sinapati Auseuga Falanisisi Soalaupule o Fusi Safata, Toleafoa Malo, Alapapa Fano, Laumatia Falaniko o Fausaga Safata, ma Pepe Viiga o Tafitoala Safata.
O le tafea o le talosaga a Leota Su‘atele ma nisi o matai o le itumalo ae suipi le talosaga taofi poo le strike out motion a Tuia Paepae ma isi matai o le itumalo, ua faatonuina ai foi ma le itu a Leota Su‘atele Manusegi e totogi le tau o le faamasinoga e $800 tala mo le itu a Paepae Tuia faapea ma le Peresetene o Faamasinoga o Fanua ma Suafa.
E lei faamautu se aso o le a suesueina ai le talosaga a Tuia Paepae ma isi i le faamasinoga o Fanua ma Suafa.
