E lei mamao tele atu ona tatala le mafutaga a le ekaleisa EFKS i Otahuhu, ma le susuga i le toeaina sa tausia le galuega mai le tele o tausaga ua mavae.
O le susuga ia Sale ma le faletua o le feagaiga taulagi lea a le Ekalesia, sa tatala e le maliu ma le oti le feagaiga sa osia, aua le tausia ma le leoleoina o le lafu mamoe a le Atua i lea foi tovine.
O le toesea o le auauna a le Atua e ala i le valaau paia, o se avanoa tāua tele foi lea sa toe fefulisai ai finagalo ma fetalai le atua fetalai, i le mamalu i tamalii ma ponaoo, aemaise muliauma eseese o le ekalesia, mo le sailia o se isi toa na te faaauauina le galuega, aua agaga galala ma le fia aai i le finagalo o le Atua.
O le susuga ia Ata ma le faletua ia Mouaana Milo, o i laua ia sa taunuu ma iu i ai le faiga filifiliga a le Ekalesia, ina ia avea ma o latou taitai.
Na ua mae‘a le filifiliga ma ua tautino foi le solo a le tamaloa, peitai sa tuu i talosaga le faamoemoe o le ekalesia i le aso ma le taimi o le a faataunuu ai le manaoga ua taofi nei i ai. O le aso ma le taimi sa tuupoina mo lea faamoemoe, sa faataunuuina i le faaiuga o le vaiaso na tea nei.
O le sauniga mo le osia o le feagaiga a le susuga ia Ata ma le faletua, sa faataunuuina i le malumalu o le Atua i Otahuhu lava, i le Aso Toonai na sei mavae atu nei.
Faagasologa o le sauniga
O le susuga i le faifeau toeaina ia Tanielu T Mamea, o ia lea sa taitai i le sauniga o le osiga feagaiga i le va o le faifeau, Ekalesia ma le Atua.
O le susuga ia Eperone Futi ma Victor Pouesi, sa fofogaina ma faitauina le Tusi Paia.
O le tatalo mo le osiga feagaiga, sa taitaia e le susuga i le faifeau toeaina ia Tavita Taulealo, o le sui o le komiti faatonu a le matagaluega.
O le faafeiloaiga ina ua mae‘a le tatalo, sa faataunuuina e Tavita Taulealo ma le faletua e fai ma sui o le Ekalesia aoao.
O Mulipola Sioeli, o le tiakono toeaina ma le faletua, o sui o le matagaluega a Manukau. O faifeau ma faletua o le pulega a Manukau i Sisifo, atoa ai ma sui e toatolu mai le Ekalesia i Otahuhu.
O le lauga sa vaevaeina i vaega se lua: O le lauga muamua, o le upu faalaeiau mo le susuga i le faifeau ma le faletua, sa saunoa i ai le susuga i le faafeagaiga ia Petaia Lokeni.
O le lauga lona lua, sa agai tonu mo le aulotu, o le susuga ia Vaaelua Patu.
O le tatalo faamanuia, sa saunia lava e le taitai toeaina ia Tanielu T Mamea.
O le susuga ia Ata, ua avea nei ma faifeau taulagi o le ekalesia, o se a‘oa‘o sa faauu mai le laumua i Malua, le nofoaga o le aoga faafaifeau a le Ekalesia Faapotopotoga Kerisiano Samoa. Sa galue o ia, ina ua mae‘a ona faauu mai Malua, i le aulotu EFKS i Dawson Rd, Flatbush i Manukau, i lalo o le taitaiga a le susuga ia Dr Peni Vai, ua valaau i ai le Atua i le tausaga talu ai.
E valaauina nei le susuga ia Ata Milo ma le faletua ia Mouaana mo le galuega i Otahuhu, o loo galulue pea i lea lava ekalesia i Dawson Rd.
O le mae‘a ai o le sauniga sa alo ai loa le mamalu i susuga i toeaina, faifeau ma faletua, aemaise o le mamalu o le au valaaulia, i le taumafataga matagofie tele sa saunia lava e le ekalesia.
O le tuanai ai o le taliga o le sua ma le taumafataga, ona sosoo ai lea ma faaaloaloga a aiga o le susuga i le faifeau fou ma lona faletua, aemaise foi o le Ekalesia, aua le aufaigaluega a le Atua, ma valaaulia sa auai i lea aso.
