Sauni le Au Fusu NZ mo taaloga a le Taupulega

Ua lava saunia tapenaga a le Au Fusu a Niu Sila nei mo Taaloga o le Taupulega, e ui i le tulaga maaleale ma le faapopoleina i le saogalemu o tama taaalo, ona o faiga tau faamatau a le vaega a le Au Faatupu Faalavelave le Al Qaeda.
O le masina fou o Mati lea o le a faataunuuina ai nei taaloga i le aai o New Delhi i Initia, ae e toavalu alii fusu ma alii Ofisa e toatolu lea ua fuafua e malaga atu e tauaveina le tagavai a Niu Sila nei mo ia taaloga.
E tele foi nisi au taalo a isi foi atunuu e lei mautinoa lava lo latou auai i nei taaloga a le Taupulega a Peretania, ona o le faapopoleina lava i le saogalemu o tagata lautele, lea foi ua le auai ai ma le au Hockey a Niu Sila nei. Na saunoa le susuga i le Taitaifono o le Pulega o Fusuaga a Niu Sila nei le susuga a John McKay e faapea, o le tuaoi tonu lava o Initia ma Pakisitani lea e toatele le vaega o le tapuaiga Musalemi, lea o loo malosi tele ai le tau faamatau aemaise lava le aai o Kashmir Valley, ma e leai se mea o le a faapopoleina ai fua au taaalo i le tau faamatau, ma taofia ai fua fuafuaga ma polokalame ua maea ona fuafuaina mo taaloga o loma nei.
O nisi la nei o alii fusu o le a fai ma sui o Niu Sila nei, Reece Papuni mai Christchurch (light heavyweight), Bowen Morgan (welterweight), Nort Beaucamp (lightweight), Nathan McEwan (middleweight) ma nisi o le Pulega, e ui lava i le tulaga le faapopoleina i le soifua ma mafutaga ma aiga ma fanau o le au fusu o le a malaga atu nei e fai ma sui o le atunuu, ae e maualuga pea lava le manatu o le Pulega e faataunuuina pea le faamoemoe, ona o taaloga nei o le Taupulega e le mauagofie ni avanoa faapenei e tauva ai ma isi foi au a isi atunuu.
Talosia ia le faamoemoe o le Au Fusu a le atunuu nei ia saogalemu ia ma maua foi ni ‘ai mo Niu Sila.