Na valaaulia i Samoa le vaega o le au Tusitala ma le au Faasalalau ina ia auai atu i le sainiina o le Konekarate Fusu a se tasi o alo talavou o Samoa lea ua maoae foi lana taumafai i le taleni o faipelega i lenei foi vaitau, o le alii fusu o Leti Leti lea ua maua nei le avanoa e saini ai lana Konekarate i le tasi o vaega mai Amerika ua faaigoaina o le TKO Boxing Promotion i Las Vegas. O lea faamoemoe na faataunuu i le Aso Tofi o le vaiaso talu ai.
O le alii talavou lenei o Leti Leti e 22 tausaga o lona soifua mai le afioaga o Faleapuna, o le alo o se tasi o tamalii iloga foi lona tulai mo Samoa i tausaga ua mavae le Susuga a Emelio Leti.
O Leti Leti na amata mai lona taumafai i faipelega mai Samoa ma avea ai ma Siamupini o le Bantam Weight i le tausaga 2003 i le 2004, o le 2006 na avea ai ma siamupini o Samoa i le paga o le Light Featherweight, na avea foi ma siamupini i le vaega o le Welter Weight i le tausaga e 2007, ma o le tausaga lava foi lea e tasi na fai ai ma sui o Samoa i taaloga o le Oceania Tournament ma Pine Auro ai mo Samoa.
O le mae‘a ai o ia taaloga na maua ai lona avanoa e malaga mai ai i Niu Sila nei ma faaauau ai lana taaloga ma avea ai foi ma siamupini o Niu Sila nei i le paga lava lena o le Welter Weight i le tausaga na tea nei 2009.
Na saunoa le alii Pule o le TKO Boxing mai Amerika ia Cameron Dunkin e faapea, o se tasi lenei o alii talavou na amata mai lava i Samoa lona taumafai, e mautinoa afai ae tumau ai pea ma agai i luma lona lelei, e le taumate o le tasi lenei David Tua mo le lumanai.
O le masina o Ianuari lea na tea nei le aso 31, na maimoaina ai foi e le toatele o le atunuu le mataina o le tulaga ua oo i ai le alii o Leti Leti i faipelega ina ua malolo ai le alii o Aron Burlett mai Niu Sila i le sueina o se au fusu a Niu Sila nei mo le Bledisloe Cup e fetaui ai ma le au fusu a Ausetalia i le ogatotonu o le tausaga nei, o le fusuaga lea na amata ai le faapolofesa a le alii o Leti i lana malo i le tui oti ia Aron i le taamilosaga muamua.
O le sauni atu o lea alii talavou mo Amerika o se laasaga ma se matatia maualuga lea ona o le a mafai ona maimoa ai le lalolagi i Televise ma tatala ai ona avanoa e tele mo le lumanai.
O le faaiuga o le vaiaso lea na toe mafuta mulimuli atu ai le alii o Leti Leti i si ona aiga i Faleapuna ae lei malaga atu mo lona aiga fou lea ua maua nei ma le lalolagi fou o fusuaga.
