Ua tele mai le mau faafitauli ma ua pesi mai faigata o lenei soifuaga ae o le pipii lava i le Alii le tali.
O nisi taimi e faigata ona mulimuli atu i le Alii ona o le faasili o mea o lenei olaga, peitai fai mai fetalaiga a le Alii Faaola o Iesu, o sē tuua lona tina poo lona tama poo lona aiga ae mulimuli mai ia te au, e tai sautuaselau ona manuia ou te avatu.
E lei faigata foi ia Peteru ma Ioane ona tuua lo la tamā ma la laua galuega faifaiva sa tausi ai lo latou aiga ae mulimuli ia Iesu, ona ua talitonu i lana fetalaiga “Mulimuli maia ia te au”.
I le faatasiga a le Ekalesia Aso Fitu Samoa Tutoatasi o le faleono a le Matagaluega a Kuiniselani i le Aso Sapati, aso 27 o Fepuari, sa faia ai se valaau mo i latou e fia ofo atu o latou soifua mo le tasi tausaga atoa e auauna ai mo Iesu lea e faaigoaina o le T.M.I. Talavou Mo Iesu, Tamā mo Iesu pe Tinā foi mo Iesu.
Sa faatumulia le faatasiga i le mamalu o le Matagaluega aemaise foi o e sa asiasi mai. E lei auai le taitai o le Matagaluega a Kuiniselani le Susuga ia Pr Lagolago Levae ona o loo feagai foi ma tiute o le galuega i Perth.
O le susuga i le faafeagaiga ia Pr Johny Siofele sa feagai ma se lesona, ae o le upu faalaeiau auā le valaau faapitoa, sa feagai lea ma le susuga i le Faafeagaiga ia Pr Togamau Tuiā.
O le susuga ile faafeagaiga ia Pr Faamalologa Fuimaono sa feagai ma isi tiute i luga o le fata faatasi ai ma le taitai toeaina o le Matagaluega le susuga i le toeaina ia Tamala Seumanu Fetoa‘i.
Na lagona le pa‘i o le Agaga o le Atua e ala i nisi o tinā sa ofoina o latou soifua mo lenei tasi tausaga e toesea ai ma lona aiga ae auauna mo Iesu e ala i le galuega talai. E le o se talaiga o se lotu peitai ole talaiga lava o le finagalo o le Atua.
O nisi o i latou sa mafai ona tali le valaau e aofia ai le faletua ia Mareta Pusa Iose, Elisa Le‘au, Malae Iese ma le tina ia Christina Mata‘ia.
O le alo lea o le susuga i le toeaina ia Pr Iva Mata‘ia o le toa manumanu lea a le Tutoatasi i le galuega tau faatalai lea ua mālōlō atu i tiasā.
O i latou nei e tele se tāua i totonu o aiga peitai o le ofoina atu o latou soifua ua faalagolago atoa e tausia e le Atua i latou faatasi ma o latou aiga e ala i le faatuatua pe a toesea ma le tasi le tausaga, aua o nisi e ono valaau i nisi atunuu pe a maea ai le ono vaiaso o a latou aoaoga.
Ua sauni atu i latou nei e tuuvaa atu i Sini mo a‘oa‘oga i le ono vaiaso, ona iloa ai lea poo fea o le a galulue ai. Faamanuia le Atua i le ofoina atu foi o soifua o nei faletua auā le galuega a le Matai.
