Osi feagaiga Hazel Aia Silafau & Archie Su’a Atonio

Ua moni ai lava upu a le atunuu, “O le faamoemoe ua taunuu o le laau o le soifua lea”. Ua ea foi le pologa i mafaufauga ma lagona e tuufesili pea poo afea a tini ai se tausinioga i le nofo valavala ma le fia afe o maila e faimalaga ai ona o le fia vaai i le tausala. Leitioa foi a saafi le aufatupese e pei o le alii o Aniseto i le alofa o loo i le tulimanu o lona fatu, tusia ai se pese mo le pele.
E pei la ona faataunuuina i le Aso Toonai, aso 19 o Tesema na vavala ai ata o ta’ulelei e ala i le tali o lea fesili e fatufatu pea i lagona ma manatu o se tamaitai poo se alii i taimi o faigauo, ma tuufaatasia ai se aiga fou e ala i le sakalameta o le faaipoipoga.
O le tamaitai faaipoipo o Hazel Aia Sialafau, o nai ona matua o Filomena ma Molimau mai le alalafaga o Nofoalii ma Leulumoega. O le alii faaipoipo o le susuga ia Archie Su’a Atonio o se alo e faasino ia Moa mai le alalafaga o Saipipi ma Su’a Atonio mai Salelavalu i le motu tele i Salafai.
Sa taitaia le sauniga faapitoa e le susuga ia Bishop Nisa o le Ekalesia a le Au Paia o Aso e Gata Ai. Na matuai faatumulia le Centenary Hotel i le mamalu o le uarota, aemaise o aiga ma uo i le molimauina foi o lea aso taua ma le matagofie, o le osia lea o se feagaiga i luma o le Alii.
E leai lava ni faasamoa maotua ae o faaaloaloga masani lava auā le paia ma le mamalu o le auvalaaulia sa tapenaina e aiga-na-lua. O le taumafataga felanulanuai na matuai lava tapena vaega uma ma o le ala foi lea e lei lagonaina ai se leo paulua ae na o tala lava o le fiafia ma le olioli ua atili aulelei ai ma faatumauina le agaga fiafia i le aiga fou, ae sili ai le viia o le Atua e mātua, ona ua tini lau o faamoemoe o alo ma fanau.
Sa momoli foi faamanuiaga mai le Siufofoga o le Penina o Asuisui Switch 1197AM Brisbane, mo le aiga fou ua faatasia nei.