E fiafia lava foi e toe faatalofa atu i le mamalu o le aufaitau i lenei vaiaso, aemaise lava i latou o loo tulituliloa mai le sosooga o le tatou tala faasolo i vaiaso taitasi. E iai le talitonuga o loo manuia mai le mamalu o si o tatou atunuu i le alofa ma le agalelei o le Atua, o le mea lea ia viia ai o Ia e faavavau. Ae alo mai loa i lau faitau, o lenei foi o le a toe sosoo atu le tatou Fagogo, E tauaso le alofa.
Na pau mai le tatou tala i le vaiaso lea na tea nei i le taimi na savali atu ai le tamaitai o Rosalia i le vaega e fufulu ai ipu ae faafuasei ona ia faalogoina le papai atu o lima o se tagata i ona tua ma musumusu atu ina ia aua le popole e le tai tai lava tautala Sinatala. E lei taumatea e Rosalia le tagata lea aua na ia iloa lelei lava i lona leo, o le tama foi o Mativa. Na ese le faalogo a le teine i ona tino aua o le upu moni ua sola faafuasei lava le fiafia ma le fia faapipii atu o le loto faananau o Rosalia ia Mativa talu ai lona maasiasi. I lana lava foi faaiuga ua tonu lava ia te ia e le toe fia nofo i le fale o le faifeau. Ua faigofie i le teine o Rosalia ona faaselemutu ona lagona tutupu ae i le taulealea aua e le faapea o se la mafutaga ua leva. Ana o se mea ua tau aso pe vaiaso foi ona osi le la faigauo pe o penei e tau iai sina faigata ona momotu mai o lona loto ia Mativa. Peitai ona o se mafutaga oso faafuasei na ala ai ona ia faigofie ona taotaoina ona lagona e pei o se tautai matapalapala i aso faigata.
Na tei le alii o Mativa aua fa ia o le a liliu ane Rosalia ma tali atu ia te ia, peitai ua na o le punou o le teine ma atigu i le mea na tupu. A mafaufau atu i le taoto atu o Mativa i ona luga ma le taumafai ina ia tatala ona ofu ona ita lea aua ua pei ia o se teine talitane i le vaai a Sinatala talu lona faatamala.
A mafaufau foi i le taimi na tini ai le malase o faaosoosoga o tuinanauga le faamalieina o le tino, ona ia anitema lea i lona faavalevalea, aua o lea ua faamanu e poia i ofaga lona teine e Mativa ae leai ma se la masaniga, sei vagana ai lava le fale o le faifeau. Na savali ane nei Rosalia i lona potu ona toe nofo lea i luga o le moega ma maligi ai ona loimata, ona ia tago lea i le laupepa ma le peni ua tusi ai lana tusi.
Mo Mativa,
“Ua ou iloa le faigata o lagona o le faalumaina talu ai faaosoosoga na semanu e faaseseina ai i taua. O le upu moni ua ou le mafaia ona ou tataliina lagona o le maasiasi talu mai le taimi na maua ai i taua e Sinatala, aua ua pei au o se teine leaga talu ai lou faatamala. O le mea lea Mativa, malie lou finagalo ona ua ou filifili e faaaogaina le laupepa lenei e tusia atu ai ni ou lagona vaivai e tusa ai ma lau faaiuga ua fai i lo ta va”.
“Ou te leiloa lava pe aisea na ou tau sese ai ia te oe ae o loo molimau le lagi e leai ma se taimi na faapea na o ta talanoa ai i se mafutaga i le va o oe ma au. E oo lava foi i se vaai atu i le lumanai mo i taua e ta te lei faasoa ai foi i lea tulaga. O le mea lea Mativa, malie maia lou finagalo. Ou te le toe manao lava e te toe talanoa mai i se tulaga e aliali mai ai ni manatu faaleuo i lo ta va. Ou te le toe manao foi ina ia e toe papai mai i lou tino i se pai a se tagata e foliga mai o loo iai ni ona lagona fia mafuta ia te au. Ua ou manatu ina ia ta faaaogaina le avanoa taua e pei ona sa tatou talanoa ai ma Sinatala, e toe fotuai ai se isi suiga lelei mo taua. Ae a e alofa o lau toe talosaga, ia e faamaoni isi au uo o i Samoa. O au foi latou ia, o le a taatia ai faapea. Afai lava o le a leai se tasi e ma te mafuta, o le a le afaina lea ia te au.
O le mea sili ia o tatou maua se mafutaga mama ma le lelei o i tatou o fanau a le faifeau ma lona faletua, tusa lava pe eseese o tatou tupuaga. Ae malie maia lou loto. Ou te le toe fia oo lava i lagona pogisa o le faalumaina e pei ona ua lofia ai nei au. Ou te manao foi ia te oe ina ia e alofa ma talia mai lau faatagi atu, aua ua ou lototele foi afai o le a se isi tulaga e toe tulai mai i le lumanai, ona e malie lea o le a ou tautala loa ma faailoa i le faifeau. Ae ia manuia le lua mafutaga ma si au uo o i Samoa.”
O Rosalia.
Na uma ona tusi le tusi a le teine ona ia tago lea ua naunau ma tuu i luga o lona moega, ae toe savali ane i fafo e vaai poo a feau o le afiafi e tatau ona faauma. Na pei lava e lei iai se mea na tupu ina ua oso ane Sinatala ma uu le lima o Rosalia ma fai i ai e la te savalivali i le faleoloa e faatau mai se saimini e fai ai le supo o le latou meaai o le afiafi. Na savavali ma talitalie atu i le auala ia le solo a le au maula ia, ae o le taimi lea o loo faapea ona tafu le saka a le alii o Mativa i le umukuka. E fai lava la le saka a le taulealea ma faasolosolo ona mafaufauga i Samoa i nai ona matua ma le latou aiga pe o a mai. O le isi foi itu, ua faasolosolo ona mafaufauga i le teine o Maumea pe o faapefea mai lana faamuli. Na toe manatua vave e le tama lana pepa telefoni o le Call Samoa Card lea sa faatau mai i le faleoloa, ona ia savali ane loa lea ma avane faatasi ma lana telefoni feaveai ona vili loa lea i Samoa.
Na tatagi le telefoni ma o se lagona na faafiafiaina ai le tama ina ua ia faalogoina si ona tuafafine o Sunema lea o loo tali mai le telefoni. “Sole, Mativa o oe lea” “Ia o au lea e valaau atu. O a mai outou”? Na tali fiafia ane Sunema e uiga i le latou faamuli aemaise o loo manuia pea nai o latou matua, ae faalogoina loa le valaau ane o le loomatua pe o ai lea ei le telefoni. Na tuu i ai e Sunema le telefoni ona fai lea iai o le tama o Mativa lea o loo valaau mai e asi i latou.
“Oi talofa e, isi au tama. Ia o lenei lava e manuia ae o a mai oe?” E lei uma ane le tali a Mativa ae toe oso atu ma le isi fesili a lona tina pe o a mai Niu Sila ma le mea o loo nofo ai, ae sa faafiafiaina le loomatua ina ua tali mai le tama o loo lelei mea uma. E oo lava foi i le latou mafutaga ma le faifeau ma lona faletua ma si a la fanau o loo sologa manuia lava ma e leai ma se mea o faaletonu ai. Na momotu faafuasei le talanoaga ina ua le tautala le loomatua mo ni nai sekone ina ua fesili ane i ai Mativa pe lei toe alu ane Maumea e tafao ane i le latou fale ma asi ane i laua.
“Oi, aua e ke koe mafaufau mai i lega kamaikaiga lakou ia. E ke iloa oe o lele ga sau gei Gema sa oaku i kai i le faamasigoga ma fai mai o la sa sau le kaavale mai Muliguu ae kilokilo aku o Maumea ma le alii legei o Kala la e faauouo mai. Ai ua alu le aso o fai amioga makaga i Muliguu ga sa kei ai iga ua sau le kaavale faapea e le iloa aku laua e gisi, ae kei i le vaai aku i ai o Gema. Ia faalogo lelei mai lava oe si au kama. Aua lava gei koe maimauiga mai lava sou kaimi e ke mafaufau mai ai i le ga kamaikaiga ia. Sei vaai i ai i le leaga o le kui lea ua kui mai ai oe.
Oi, a fai aku le maimau o oe i lea mea aivalea ae sei vaai i aga mea ia e fai mai. Aua lava gei e solia lau kala lea. O le mea sili o lea ua iloa ai i i e le o se keige lelei. Ga sau gei kagikagi mai ma faailoa mai oga alofa ia ke oe, ae sei vaai la oe i ai. Gi alofa le alu koso lalau i Muliguu ae o lega lava e ke alofa mai ai. Ia kago oe e sue lelei lava se keige iiga e alofa mogi ia ke oe e fai ma ou koalua. Faakoa e iloa lava lea ua ou le fiafia ia oe pe afai ae e le usikai mai i lau kala lea. Ia e iloaiga lelei lava o lou alofa faamaogi ia ke oe lea ua ou fai aku ai”.
Na uma le tala umi a le loomatua ona faapea mai lea o le tama, “Ia ua lelei tina. O le mea sili o lena e manuia mai oe. O le mea sili foi o lena o loo lelei lava mea uma i le tou faamuli. Ae ua lelei sei uma ona ou toe talanoa atu lea i se aso o i luma”.
Na tape e Mativa le telefoni ona nofo ifo lea i lalo ma pulatoa i le ulo lea o loo fai ai lana saka. Ua soloatoa lona mafaufau ona e le talitonu i le tala lea o loo fai ane e lona tina. E matua mamao ma ona manatu e mafai ona fai e Maumea se mea faapea ia te ia, aua ua ia talitonu i le alofa o le teine atoa ai ma lona talitonuina o ana upu na folafola ane i le taimi mulimuli na o la faamavae ai. Ua toe tau lona mafaufau ia Tala ona oso lea o lona ita. Ua maimau ona alofa sa fai ai Tala ma se tasi e alofa moni i ai e pei o sona uso, ae o lea ua foliga mai ua ia faalata ia te ia. Ua tonu i lona mafaufau o le a valaau i le aiga o Maumea ona e lelei lava le faafesili i ai atonu e maua mai ai le tala sao. Na tago le tama ua toe avane le pepa telefoni o loo iai le numera e vili ai i Samoa ae tei i lona vaai atu ua pupuna i lalo le vai o le saka, ona toe taatia lea o le telefoni ae savali ane ma susue le ulo ma iloa ai ua vela talo. Na aapa ane le tama ua uu atu le sololima ma kava ai ona lima, ona punou ifo lea ma sii le ulo. O le alu tele o lona ulu i le tala mai lona tina na faafuasei ai ona see lona uuina o le ulo ma pau ai loa i lalo ma masaa ifo i luga o ona tulivae.
E faia pea
